Serikali ya Uganda itapunguza ukopaji kutoka nje kwa asilimia 98 ili kupunguza deni la nchi linaloongezeka, kwa mujibu wa Wizara ya Fedha.
Wizara pia ilitangaza punguzo kubwa la matumizi ya serikali na ukopaji wa ndani kwa mwaka wa fedha wa 2025-2026.
Matumizi ya jumla yatapunguzwa kwa zaidi ya asilimia 20, na pia kupunguza ukopaji wa ndani kupitia dhamana za Hazina kwa asilimia 54 katika mwaka ujao wa fedha ili kupunguza shinikizo la deni na kuzuia shida.
Uamuzi huo unakuja wakati nchi ikikabiliana na ongezeko la deni la umma, ambalo lilipanda hadi dola bilioni 25.6 mwezi Juni kutoka dola bilioni 23.7 mwaka uliopita, kulingana na taarifa ya Wizara.
Kiwango cha juu cha madeni
Kufikia mwaka 2023, deni la umma la Uganda lilikuwa limefikia kiwango ambacho hakijawahi kushuhudiwa, na kuchangia asilimia 52 ya Pato la Taifa.
Kuongezeka kwa deni la umma kumeibua wasiwasi kuhusu uwezekano wa mzozo kamili wa deni iwapo hatua za haraka hazitachukuliwa kubadili mwelekeo.
Ingawa serikali inadai fedha zilizokopwa zilitumika kukuza ukuaji wa uchumi, kuongezeka kwa deni la umma kumesababisha kushuka kwa viwango vya mikopo.
Ramathan Ggoobi, Katibu Mkuu wa Wizara ya Fedha ambaye pia ni Katibu wa Hazina, aliliambia Shirika la Anadolu kwamba Uganda imekabiliana na majanga kadhaa, ikiwa ni pamoja na mfumuko wa bei na viwango vya riba.
Athari kwa uchumi
Aliwahakikishia wanaosimamia sera za fedha kufanya kazi bila kuchoka ili kuhakikisha kuwa deni hilo halina athari mbaya kwa uchumi.
"Uchumi umepanuka hadi takriban dola bilioni 53, na uwekezaji wa moja kwa moja kutoka nje umekua kwa kiasi kikubwa kwa sababu ya usimamizi mzuri wa uchumi, miongoni mwa vipaumbele vyetu ni kuhakikisha kuwa deni kubwa la umma haliathiri ukuaji wa uchumi," alisema.
"Uimarishaji wa fedha unaendelea vizuri, miongoni mwa njia nyingi za kulipa deni ni kuhakikisha uchumi unakua," aliongeza.
Ripoti ya Benki ya Dunia hivi majuzi ilisema kuwa nchi nyingi zimefikia viwango vya juu sana vya madeni, pamoja na viwango vya juu vya riba ambavyo imekuwa ni changamoto kwa nchi nyingi.
Ripoti hiyo inabainisha zaidi kwamba "kila robo mwaka viwango vya riba vinabaki kuwa juu, hivyo husababisha nchi zinazoendelea kushindwa kulipa madeni yao au kuwekeza katika utoaji wa huduma za kijamii kama vile afya ya umma, elimu au miundombinu."
