"Tunaendelea kuwa katika hali ya mtiririko hasi wa fedha, kutokana na kupungua kwa karibu asilimia 50 ya mapato ya matangazo na mzigo mkubwa wa deni," tajiri huyo alijibu kwenye Twitter kwa mtumiaji ambaye alikuwa akitoa mapendekezo ya mkakati kuhusu mtandao wa Twitter.
"Tunapaswa kufikia mtiririko chanya wa fedha kabla ya kuwa na fursa ya kufanya chochote kingine," aliongeza, bila ufafanuzi zaidi.
Mabadiliko yaliyofanywa na Elon Musk tangu achukue udhibiti wa Twitter yamewakasirisha watumiaji na wafadhili wa mtandao huo.
Mnamo Mei, kampuni ya utafiti wa masoko, Insider Intelligence ilidai kuwa Twitter ilitarajiwa kupata mapato ya chini ya dola bilioni 3 ifikapo 2023, karibu theluthi moja chini ya mwaka 2022.
Tangu wakati huo, tajiri huyo amefanya tangazo lingine ambalo limekasirisha watumiaji, kama vile nia yake ya kuanzia Julai kuzuia upatikanaji wa matweets hadi 10,000 kwa siku kwa akaunti zilizothibitishwa, ambazo ni za kulipia, 1,000 kwa akaunti nyingine, na hata 500 kwa akaunti mpya.
Siku chache baadaye, tangazo lingine: programu ya TweetDeck, ambayo hutumiwa sana na wataalamu wa habari, itakuwa inapatikana tu kwa akaunti zilizothibitishwa, ambazo ni za kulipia, ndani ya mwezi ujao.
