Algeria iliikumbusha Ufaransa sura mbaya ya ukoloni wake wakati wa sherehe za ufunguzi wa Michezo ya Olimpiki ya Paris mnamo Ijumaa.
Wanariadha wa Algeria walileta maua ya waridi mekundu kwenye boti yao walipokuwa wakiandamana kwa ajili ya tukio hilo, na kisha kuyatupa mtoni kuwaenzi wahasiriwa wa msako mbaya wa polisi wa 1961 dhidi ya waandamanaji wa Algeria huko Paris.
Baadhi ya wajumbe waliimba “maisha marefu kwa Algeria!” kwa Kiarabu baada ya kutupa maua.
Wanahistoria wanasema waandamanaji wapatao 120 waliuawa na polisi wa Ufaransa na 12,000 walikamatwa walipokuwa wakiandamana Oktoba 17, 1961 kuunga mkono uhuru kutoka kwa Ufaransa, mtawala wa wakati huo wa kikoloni wa Algeria. Baadhi walitupwa katika Mto Seine na polisi.
Kaci Yahia, mfanyakazi wa Algeria wa mfumo wa maji taka wa Paris, alikuwa miongoni mwao. Mwili wake haukupatikana tena.
Heshima kubwa
Mjukuu wake Yanis mwenye umri wa miaka 28, anayetazama kutoka Algeria, alikaribisha ukumbusho wa ujumbe wa nchi yake Ijumaa.
"Kufanya ishara kama hiyo, siku ya ufunguzi wa Olimpiki huko Paris, ni heshima kuu kwa wahasiriwa wa Oktoba 17. Ni wakati wa hisia kubwa," alisema.
Mamlaka ya Ufaransa yalitaka kuficha mauaji ya 1961 kwa miongo kadhaa. Rais wa Ufaransa Emmanuel Macron hivi majuzi alikiri kwamba "uhalifu" uliofanywa siku hiyo "haukuwa na udhuru kwa Jamhuri."
Algeria ilipata uhuru mwaka 1962 baada ya miaka 132 chini ya utawala wa kikoloni.
