Muungano mkubwa zaidi wa wafanyikazi wa anga nchini Kenya umeahirisha kwa wiki mbili mgomo uliopangwa kuanza siku ya Jumatatu, ili kuruhusu mazungumzo na serikali kuhusu makubaliano yaliyopendekezwa na kampuni ya India ya kuendeleza uwanja mkuu wa ndege nchini humo.
Muungano huo unaowakilisha wafanyakazi wa viwanja vya ndege, unapinga makubaliano yaliyopendekezwa yaliyotangazwa mwezi uliopita na Kampuni ya India ya Adani Airport Holdings ambayo inasema yatasababisha hasara ya kazi na kuleta wafanyakazi wasio Wakenya.
"Muungano umeamua kuahirisha notisi ya mgomo, kwa kuwa tunaenda kwenye majadiliano," katibu mkuu wa muungano huo Moss Ndiema alisema Jumapili, na kuongeza mazungumzo yatakuwa na mamlaka ya viwanja vya ndege vya serikali na wizara ya uchukuzi.
"Iwapo mkutano utashindwa kufikia makubaliano yoyote, umoja huo utatoa notisi mpya ya mgomo kwa wanachama wake."
Uwanja wa ndege ni kitovu kikuu cha usafiri wa anga na mgomo unaweza kusababisha usumbufu mkubwa kwa usafiri wa anga nchini Kenya na nchi nyingine jirani.
Serikali imesema uwanja huo wa ndege hauuzwi na kwamba hakuna uamuzi wowote uliotolewa kuhusu kuendelea na kile ilichokiita pendekezo la ushirikiano wa sekta ya umma na binafsi na kampuni ya Adani ili kuboresha kituo hicho.
Mamlaka ya viwanja vya ndege imesema Adani inapanga kuongeza barabara kuu ya pili ya ndege katika uwanja wa kimataifa wa Jomo Kenyatta na kuboresha kituo cha abiria iwapo pendekezo lake litaidhinishwa.
Kulingana na serikali ya Kenya, uwanja huo wa ndege umetandazwa zaidi ya uwezo wake wa kubeba abiria milioni 7.5 kwa mwaka na unahitaji uboreshaji wa haraka, unaokadiriwa kugharimu dola bilioni 2.
