Mahakama ya Afrika Kusini Jumatatu iliamuru kuahirishwa kwa miezi minne katika kesi iliyocheleweshwa kwa muda mrefu ya rais wa zamani Jacob Zuma, ambaye anakabiliwa na mashtaka ya ufisadi katika kashfa ya silaha iliyoanza mwishoni mwa miaka ya 1990.
Mahakama Kuu katika mji wa mashariki wa Pietermaritzburg ilisema inaahirisha kesi hiyo baada ya mawakili wa Zuma kuwasilisha ombi jipya la kutaka mwendesha mashtaka Billy Downer aachiliwe.
"Kesi hii imeahirishwa hadi Agosti 15, 2023 kwa ajili ya kusikizwa kwa ombi la pili la Bw Zuma la kumwondoa Bw Downer... kama mwendesha mashtaka wa serikali katika kesi ya jinai," Jaji Nkosinathi Chili alisema.
Jaribio la awali la kumwondoa Downer lilitupiliwa mbali na mtangulizi wa Chili, Jaji Piet Koen, lakini alijiuzulu Januari baada ya kuiongoza kesi hiyo kwa miaka kadhaa.
Kesi ya Zuma ilianza Mei 2021 na kupelekea msururu wa ucheleweshaji wa kisheria.
Wim Trengove, wakili anayewakilisha serikali, aliwahi kurejelea uahirisho usiohesabika kama "Stalingrad: Msimu wa 27" -- marejeleo ya mkakati unaofikiriwa wa kucheleweshwa kwa nguvu na utetezi.
Mzee huyo mwenye umri wa miaka 81 anakabiliwa na makosa 16 ya ulaghai, ufisadi yanayohusiana na kandarasi ya kununua ndege za kivita, boti za doria na vifaa kutoka kwa makampuni matano ya silaha za Ulaya alipokuwa makamu wa rais, shirika la habari la AFP linaripoti.
Alihudumu kama rais kutoka 2009 hadi 2018 kabla ya kulazimishwa kutoka kwa madai ya ufisadi katika sekta ya serikali.
Pia anajaribu kumwondoa Downer kupitia mchakato wa mashtaka ya kibinafsi.
