Maafisa wa uhamiaji katika mpaka wa Afrika Kusini wanasema wamekamata mabasi kadhaa yaliyobeba zaidi ya watoto wadogo 400 kutoka Zimbabwe waliokuwa wakisafiri bila wazazi wala walezi. Hatua hii imefuatia operesheni maalumu ya kupambana na biashara haramu ya binadamu.
Kamishna wa Shirika la Usimamizi wa mpaka wa Afrika Kusini Mike Masiapato amesema Jumapili kwamba polisi wa Afrika Kusini walisimama na kukagua mabasi 42 yaliyoingia kutoka Zimbabwe Jumamosi usiku na kupata watoto 443 chini ya umri wa miaka 8 wakisafiri bila kuandamana na wazazi wala walezi wa kisheria.
"Tuliwazuia kuingia na kuwajulisha maafisa wa Zimbabwe ili kuwarudisha Zimbabwe," Masiapato alisema.
Mabasi hayo yaliruhusiwa kupitia upande wa Zimbabwe wa kituo cha mpaka cha Beitbridge, maafisa wa mpaka wa Afrika Kusini walisema.
Ngqabutho Mabhena, mwenyekiti wa Africa Diaspora Forum, ambayo inawakilisha raia wa kigeni wanaoishi Afrika Kusini, alisema shirika lake linaamini mabasi hayo yalikuwa yakibeba watoto wa Zimbabwe wanaokuja Afrika Kusini kuwatembelea wazazi wao, jambo ambalo ni jambo la kawaida karibu na mwisho wa mwaka.
Alisema ni jambo la kawaida kwa watoto kutumwa bila nyaraka sahihi kuwaruhusu kusafiri kama watoto wasio na msaidizi.
"Siku zote tunawaambia wazazi wa Zimbabwe wanaoishi Afrika Kusini kwamba ikiwa watapanga watoto wao waje Afrika Kusini, lazima ... wapange nyaraka zote muhimu, " Mabhena alisema.
"Ni kutowajibika kwa wazazi kuwaruhusu watoto kusafiri bila hati za kusafiria na kusafiri na wageni. Tumeshughulikia hili na wazazi.”
