Serikali ya Afrika Kusini imemrejesha nyumbani balozi wake na ujumbe wake wa kidiplomasia nchini Israel na kulaani shambulio la bomu katika eneo la Gaza la Palestina, na kulitaja kuwa ni "mauaji ya kimbari."
Serikali pia ilitishia kuchukua hatua dhidi ya balozi wa Israel nchini Afrika Kusini kutokana na matamshi yake ya hivi karibuni kuhusu msimamo wa nchi hiyo ya Kiafrika kuhusu vita vya Israel na Palestina.
Hakuna maelezo zaidi yaliyotolewa kuhusu matamshi hayo.
Vita hivyo vilizuka baada ya kundi la wapiganaji wa Palestina Hamas kushambulia Israel tarehe 7 Oktoba, na kusababisha vifo vya zaidi ya watu 1,400.
Zaidi ya Wapalestina 10,000 wameuawa katika hujuma ya Israel huko Gaza, kulingana na Wizara ya Afya katika eneo la Wapalestina lililozingirwa.
"Serikali ya Afrika Kusini imeamua kuwaondoa wanadiplomasia wake wote mjini Tel Aviv kwa mashauriano," alisema waziri katika ofisi ya rais Khumbudzo Ntshavheni.
Aliongeza kuwa baraza la mawaziri lilibainisha "matamshi ya kudhalilisha ya balozi wa Israel nchini Afrika Kusini kuhusu wale wanaopinga ukatili na mauaji ya kimbari ya serikali ya Israel" na kwamba idara ya uhusiano wa kimataifa imeagizwa "kuchukua hatua zinazohitajika ndani ya njia za kidiplomasia. na itifaki za kushughulikia mwenendo (wake)."
Ntshavheni pia alisema msimamo wa balozi wa Israel nchini humo "haukubaliki."
Maandamano yanayounga mkono Palestina
Waandamanaji wanaounga mkono Palestina - ambao wamekuwa wakifanya maandamano ya Ubalozi mdogo wa Marekani mjini Johannesburg na balozi za Israel huko Pretoria na Cape Town - wameitaka serikali ya Afrika Kusini kumfukuza balozi wa Israel.
Waziri wa uhusiano wa kimataifa Naledi Pandor, ambaye siku ya Jumatatu alimkaribisha mwenzake wa Ukraine Dmytro Kuleba, alisema maafisa hao wa Afrika Kusini wataitwa kutoka Tel Aviv ili kuipa serikali taarifa ya kina kuhusu hali ilivyo katika eneo hilo.
"Tunahitaji kuwa na maingiliano haya na maafisa wetu kwa sababu tuna wasiwasi mkubwa na kuendelea kwa mauaji ya watoto na raia wasio na hatia katika eneo la Palestina na tunaamini asili ya kukabiliana na Israeli imekuwa adhabu ya pamoja," alisema Pandor.
Serikali ya Afrika Kusini, inayoongozwa na chama tawala cha African National Congress chenye uhusiano wa karibu na Palestina, imetoa wito wa kusitishwa mara moja kwa mapigano huko Gaza na misaada kuruhusiwa kuingia katika eneo hilo lililoshambuliwa kwa mabomu.
Afrika Kusini ni miongoni mwa nchi nyingine zitakazowaita tena mabalozi wao nchini Israel kupinga mashambulizi ya Gaza, ikiwemo Chile, Colombia Honduras.
Bolivia ilikata uhusiano wa kidiplomasia na nchi hiyo. Israel ilizikosoa nchi za Amerika ya Kusini wiki iliyopita na kuzitaka Colombia na Chile "kushutumu waziwazi Hamas."
