Hospitali ya Bethesda huko Goma ilizidiwa Januari 23 huku majeruhi kutoka kwa mashambulizi yanayoendelea ya waasi wa M23 wakiendelea kuongezeka, huku waathiriwa wakisimulia vitendo vya kuhuzunisha baada ya kunusurika.
Wafanyakazi wa matibabu walijitahidi kukabiliana na mmiminiko huo, na hivyo kuweka mahema ya dharura karibu na majengo ya hospitali ili kuwahudumia waliojeruhiwa.
Jeannette Neema Matondo alielezea jinsi bomu lilivyoshambulia kundi lake walipokuwa wakikimbia mji uliozingirwa wa Mubambiro.
"Kila mtu aliyenizunguka alikuwa amekufa, amepondwa kama nyama," alisema.
Matondo pia alipoteza watoto wawili katika mlipuko huo.
Kundi la M23 ndilo la hivi punde zaidi katika msururu wa makundi ya waasi wanaoongozwa na Watutsi kuibuka dhidi ya majeshi ya Congo.
Kundi hilo, lililopewa jina baada ya tarehe 23 Machi ya mapatano ya 2009 ambayo yalimaliza uasi wa awali ulioongozwa na Watutsi, linaishutumu serikali kwa kutotii makubaliano ya amani ya kuwajumuisha Watutsi wa Kongo kikamilifu katika jeshi na utawala.
Baada ya kuuteka mji wa Minova siku ya Jumanne (Januari 21), wapiganaji wa M23 wameendeleza mashambulizi yao, wakihamia mji wa Sake, karibu kilomita 20 kutoka Goma.
"Mgogoro wa kibinadamu nchini DRC unaendelea kuongezeka. Mizozo, kuhama na ufikiaji mdogo wa huduma muhimu unaathiri karibu watu milioni 3 katika eneo la Mashariki, " Shirika la Msaada wa Kibinadamu IRC imesema. " Timu nyingi za IRC huko Goma zinafanya kazi kutoka nyumbani huku mabomu yakianguka nje kidogo ya jiji," imeongezea.
Wakati huo huo, hofu ya maendeleo zaidi ya waasi imewakumba wakazi wa Goma, na kuwafanya wenye maduka wengi kufunga biashara zao.
Masoko ambayo hapo awali yalikuwa na shughuli nyingi sasa yamebaki bila watu, kwani kutokuwa na uhakika juu ya hatua inayofuata ya waasi kunalemaza shughuli za kiuchumi.
