Shirika la afya la Umoja wa Afrika siku ya Jumatano lilisema linakaribia kupata karibu dozi milioni moja za chanjo ya mpox, na kuwataka watengenezaji kushiriki teknolojia ya kutengeneza chanjo ili kukabiliana na ugonjwa huo.
Afrika iko mstari wa mbele katika mapambano dhidi ya Mpox, huku Shirika la Afya Duniani (WHO) lilitangaza dharura ya kimataifa mapema mwezi huu kutokana na kuenea kwa ugonjwa huo wa virusi.
"Tunaelekea kupata karibu dozi milioni," ya chanjo ya Mpox, Mkurugenzi Mkuu wa Vituo vya Afrika vya Kudhibiti na Kuzuia Magonjwa (Africa CDC) Jean Kaseya aliuambia mkutano wa kikanda wa WHO katika Jamhuri ya Kongo.
Nchi kadhaa zimeahidi kupeleka chanjo katika nchi za Kiafrika zilizokumbwa na milipuko, huku Uhispania pekee ikiahidi dozi 500,000.
Chanjo zitatengenezwa barani Afrika 'hivi karibuni'
Kaseya alisema dozi 215,000 za chanjo tayari "zimepokewa" kutoka kwa mtengenezaji wa Denmark Bavarian Nordic, lakini aliitaka kushiriki ujuzi unaohitajika ili chanjo hiyo itengenezwe ndani ya nchi.
"Tuliiambia Bavarian Nordic kwamba tunahitaji uhamisho wa teknolojia kuelekea wazalishaji wa Kiafrika," alisema, akiongeza kuwa aliamini chanjo ya Mpox itatengenezwa barani Afrika "hivi karibuni."
Hapo awali ilijulikana kama Monkeypox, Mpox ni ugonjwa wa virusi unaoambukizwa kutoka kwa wanyama hadi kwa wanadamu ambao unaweza pia kupitishwa kutoka kwa binadamu hadi kwa binadamu, na kusababisha homa, maumivu ya misuli na vidonda vya ngozi.
Kuibuka tena kwake na kugunduliwa kwa aina mpya ya ugonjwa huo katika Afrika ya Kati, iliyopewa jina la Clade 1b, kulisukuma WHO kutangaza kiwango chake cha juu zaidi cha tahadhari ya kimataifa mnamo Agosti 14.
Kuenea kwa maambukizi
Jamhuri ya Kidemokrasia ya Kongo, ambapo aina mpya ya ugonjwa huo iligunduliwa kwa mara ya kwanza, imebeba mzigo mkubwa wa janga hilo huku asilimia 90 ya maambukizi ya 2024 iliripotiwa, kulingana na WHO.
Burundi, Rwanda, Kenya na Uganda pia zimeathirika.
Kaseya alisema kulikuwa na takriban maambukizi 22,863 na vifo 622 hadi kufikia Agosti 27 vinavyohusishwa na aina mbalimbali za ugonjwa wa Mpox barani humo.
Mkurugenzi mkuu alisita kutoa maelezo kuhusu kesi zilizothibitishwa kwani "bado tuna nchi zilizo na kiwango cha majaribio cha chini ya asilimia 30 na bado tunazo nchi zinazokabiliwa na changamoto kadhaa katika suala la ubora na usafirishaji".
Kulingana na WHO, Afrika ilikuwa na maambukizi 5,281 yaliyothibitishwa tangu mwanzo wa 2024 hadi Agosti 25.
