Na Charles Mgbolu
Inajulikana kuwa Afrika imebarikiwa kuwa na wanasoka wenye vipaji - wengi wao wakiunda timu zao za kitaifa na vile vile vilabu vya ligi kuu nyumbani na nje ya nchi haswa barani Ulaya.
taasisi ya Football Benchmark iliripoti kuwa zaidi ya wachezaji 500 wa Kiafrika kwa sasa wanacheza katika viwango tofauti barani Ulaya.
Senegal, Morocco, Nigeria, Ivory Coast na Ghana zimesalia kuwa nchi tano zinazoongoza kwa kuwa na idadi kubwa zaidi ya wachezaji wa Kiafrika wanaotafutwa sana ulimwenguni. Wanasoka wakubwa wa kulipwa bila shaka ndio wanaojulikana zaidi na wanaosherehekewa.
Lakini, bara hili lina wachezaji wachanga au vijana mahiri huko Ulaya. Wanaonyesha viapaji vya kukua zaidi kutokana na umri wao.
Wengi wao wana umri wa chini ya miaka 17, wanazo nguvu, wepesi na ufundi mkubwa wa soka.
Kwenye mitandao ya kijamii, wana ushawishi mkubwa na maelfu ya wafuasi, na kuvutia idadi nzuri ya mikataba na dili za matangazo ya kibiashara. Hapa kuna baadhi yao kutoka Afrika Magharibi:
Neema Fawunmi, West Ham
Fawunmi, mshambulizi anayetumia mguu wa kushoto, alicheza mechi yake ya kwanza chini ya umri wa miaka 18 akitokea benchi msimu wa 2021/22 na kusaini mkataba kwa misingi ya kupewa ufadhili na Klabu mnamo Juni 2022.
Amefurahia msimu mzuri, akicheza mechi 24 na kufunga mabao kumi, huku timu yake ikipata ushindi wa kihistoria mara mbili baada ya kutoka nyuma na kuishinda Arsenal 5-1 na kubeba Kombe la FA la Vijana kwa msimu wa FA wa Vijana wa 2022-2023.
West Ham kwa sasa iko kileleni mwa jedwali la Kombe la FA la Vijana msimu huu.
Cameron Okoye, FC Bescola
Yeye ndiye mtoto wa kwanza na wa pekee wa kiume wa Peter Okoye, mmoja wa waimbaji pacha wa Nigeria P-Square, maarufu kwa vibao vyao vya kusisimua katika bara zima na kwingineko.
Cameron, 14, kwa sasa anacheza katika shule ya ukufunzi a Bescola, shule kuu ya mafunzo ya soka ya FC Barcelona. Mara nyingi anaelezewa kuwa mshambuliaji mwenye nguvu katika kitengo chake.
‘’Mwanangu ndiye zawadi muhimu zaidi nitakayoacha kwenye dunia hii. Nyota mbarikiwa wa baadaye wa soka,’’ babake Peter Okoye alisema kwenye Twitter.
Kabla ya kujiunga na FC Bescola mnamo 2017, Cameron alicheza na Little Tigers FC, ambapo alicheza katika kikosi cha chini ya miaka 9 na kutuzwa mfungaji bora katika mwaka huo.
Mnamo Machi, Peter Okoye alichapisha picha za mshambuliaji wa Napoli na Napoli, Victor Osimhen akiwa na mwanawe Cameron, akisema mwanawe alichochewa na ustadi wa ajabu wa fowadi huyo wa Napoli.
Tyron Akpata, West Ham
Tyron Akpata, 17, kutoka Nigeria, alijiunga na West Ham United kama mchezaji wa Chini ya miaka 15 kabla ya kusaini mkataba wa udhamini na Chuo cha Soka cha West Ham mnamo Juni 2022.
Kiungo huyo mdogo alifunga bao lake la kwanza kwa timu hiyo katika ushindi wa 6-0 dhidi ya Norwich mnamo Februari 2023.
Kiungo huyo wa kati anatambulika kwa kuleta nguvu na kujituma katika jukumu lake na uchezaji wake ulikuwa wa kuvutia alipokuwa na kikosi cha wachezaji wasiozidi 16.
Akpata alifurahia msimu mzuri wa kwanza akiwa na kikosi cha Kevin Keen cha Vijana wasiozidi umri wa miaka 18 huko West Ham, akishiriki mara 21 kwa upande wa Hammers hao walioshinda Ligi ya Premia ya Chini ya 18 Kusini na Kombe la Vijana la FA. Frederick Gyan, Oxford City F.C.
Frederick ni mtoto wa kwanza wa kiume mwenye umri wa miaka 15 wa mwanasoka mashuhuri wa zamani wa kimataifa na nahodha wa zamani wa timu ya taifa ya Ghana, Asamoah Gyan.
Frederick kwa sasa anachezea Klabu ya Soka ya Jiji la Oxford, timu ya soka ya vijana nchini Uingereza.
Frederick, ambaye alizaliwa nchini Uingereza, ameweza kujitofautisha kama mchezaji wa kuvutia aliposhinda mataji mawili katika msimu wa FA wa Vijana wa 2020-2021.
Mfuasi hodari wa kijana huyo ni baba yake, ambaye wakati mwingine huchapisha picha za wawili hao wakifanya mazoezi pamoja kwenye mitandao ya kijamii.
Vyombo vya habari vya nchini Ghana vinaripoti kuwa Frederick ana matamanio makubwa ya kucheza katika kiwango cha juu, kama baba yake, na anafanya mazoezi makali kila siku.
Tahadhari katikati ya shauku
Licha ya kuongezeka kwa umaarufu, hitaji soko kubwa ya vipaji vya vijana barani Afrika, wataalamu wakati mwingine huhimiza tahadhari dhidi ya ulaghai unaoweza kutokea na wa wachezaji wa kitaalamu kutoka kwa mawakala wasio waaminifu.
Mapema mwezi Julai, mshambuliaji wa zamani wa Chelsea, Didier Drogba alisema wachezaji wa kandanda barani Afrika, hasa vijana, mara nyingi hutegwa na mawakala bandia wanaouza ahadi za umaarufu na utajiri.
Kupitia taasisi yake, Drogba ameungana na chama cha wachezaji wa soka duniani FIFPRO na Shirika la Kazi Duniani ili kuongeza ufahamu kuhusu hatari hizo.
"Tafadhali, nahitaji usikie hili," mchezaji wa zamani wa kimataifa wa Ivory Coast Drogba alisema katika video ya kampeni kwa wachezaji. "Kuwa makini sana unayemwamini. Kamwe usimwamini mtu anayetaka pesa zako."
