Watu wanane waliuawa katika mji mkuu wa Somalia, Mogadishu, siku ya Jumamosi baada ya milio ya risasi kuzuka kati ya vikosi vya usalama na baadhi ya wafungwa ambao walikuwa wamenunua silaha na walikuwa wakijaribu kutoroka, vyombo vya habari vya serikali na jeshi la magereza vilisema.
Mapigano hayo yaizuka katika gereza kuu la mji mkuu, lililoko kusini mwa mji huo karibu na bandari.
Wakati wa operesheni hiyo wafungwa watano na wanajeshi watatu waliuawa huku watu 21, wengi wao wakiwa wafungwa, walijeruhiwa, Abdiqani Mohamed Qalaf, msemaji wa huduma ya magereza alisema kwenye Facebook.
Alilaumu "kundi la vurugu" kati ya wafungwa kwa shambulio hilo.
Hakuna mfungwa aliyetoroka na uchunguzi wa jinsi shambulio hilo lilitokea utafanywa, aliongeza.
Kundi la wanamgambo la Al-Shabaab limefanya mashambulizi mengi ya mabomu na mashambulizi mengine mjini Mogadishu na maeneo mengine ya nchi hiyo yenye machafuko, ingawa ni machache yaliyorekodiwa katika miezi ya hivi karibuni.
"Kulikuwa na mlipuko ndani ya gereza na majibizano makubwa ya risasi yakafuata," alisema shahidi Abdirahman Ali.
Milipuko ya bomu
“Nilikuwa karibu sana na gereza hilo wakati tukio hilo likitokea na nikaona polisi wakiingia ndani ya gereza hilo dakika chache baada ya milio ya risasi kuzuka,” alisema.
Shahidi mwingine, Shuceyb Ahmed, pia aliripoti kusikia milipuko ya guruneti na milio ya risasi.
"Nilimpigia simu kaka yangu ambaye ni mwanachama wa askari magereza, na akaniambia kwamba wafungwa kadhaa wa Al-Shabaab walipata silaha na maguruneti kwa siri na kujaribu kutoroka."
Shirika la Habari la Kitaifa la Somalia (SONNA) lilichapisha picha za maiti za watu watano wanaodaiwa kuwa ni wapiganaji wa Al-Shabaab.
Kikosi cha Walinzi wa Somalia ni tawi la vikosi vya usalama vinavyohusika na kuendesha magereza nchini.
Al-Shabaab imekuwa ikipigania kuiondoa serikali kuu dhaifu huko Mogadishu kwa zaidi ya miaka 17.
Vikwazo vya serikali
Serikali imeungana na wanamgambo wa koo za ndani kupambana na wanamgambo hao katika kampeni inayoungwa mkono na jeshi la Umoja wa Afrika na mashambulizi ya anga ya Marekani.
Lakini mashambulizi hayo yamekabiliwa na vikwazo, huku Al-Shabaab mapema mwaka huu wakidai kuwa imechukua maeneo mengi katikati mwa nchi.
