Licha ya Moscow kusitisha ushiriki wake katika mkataba wa nafaka wa Bahari Nyeusi, Rais wa Uturuki Recep Tayyip Erdogan alisema kuwa anaamini Rais wa Urusi Vladimir Putin anataka makubaliano hayo yaendelee.
"Licha ya kauli hii ya leo, ninaamini kwamba Rais wa Urusi Putin anataka daraja hili la kibinadamu liendelee," Erdogan alisema katika mkutano na waandishi wa habari mjini Istanbul kabla ya kuelekea Saudi Arabia kwa ziara rasmi.
Matamshi ya Erdogan yalikuja mara baada ya Kremlin kutangaza kusitisha mpango huo wa nafaka, ambao unamalizika leo Jumatatu.
Makubaliano ya nafaka ya Bahari Nyeusi yaliyosimamiwa na Ankara yaliingia katika historia kama mafanikio ya kidiplomasia, Erdogan alisisitiza, akiongeza kuwa Uturuki daima imekuwa ikizingatia umuhimu wa kuendelea kwa mpango huo na imeongeza juhudi za kidiplomasia hadi mwisho.
Erdogan alisema Waziri wa Mambo ya Nje wa Uturuki Hakan Fidan na mwenzake wa Urusi Sergey Lavrov watajadili makubaliano hayo kwa njia ya simu, akielezea matumaini kwamba yataendelea "bila kukatizwa."
"Mbali na hilo, tunaweza kuchukua hatua kupitia simu na Putin bila kungoja Agosti," aliongeza. Hapo awali, Erdogan alisema Putin anatarajiwa kuzuru Uturuki mwezi Agosti kujadili uhusiano wa nchi mbili na masuala ya kikanda.
Mwaka mmoja uliopita, Uturuki, Umoja wa Mataifa, Urusi, na Ukraine zilitia saini makubaliano huko Istanbul ili kurejesha mauzo ya nafaka kutoka bandari tatu za Bahari Nyeusi ya Ukraine ambayo ilikuwa imesitishwa baada ya vita vya Urusi na Ukraine kuanza mwezi wa Februari.
Kituo cha Uratibu wa Pamoja kilianzishwa mjini Istanbul pamoja na maafisa kutoka nchi hizo tatu na Umoja wa Mataifa kusimamia usafirishaji huo.
