Timu ya wakimbizi katika mashindano ya Olimpiki ya Paris 2024 imetoa wito wa uakilishi zaidi kutoka kwa wanariadha wanaoishi kama wakimbizi katika nchi mbali mbali.
Timu ya wakimbizi imechochea matumaini kwa wengi kurejesha ndoto zao ambazo zilipotea walipoacha maisha yao kuanza kutoka mwanzo katika nchi mpya.
"Nilijiambia ikiwa nitaendelea kuendesha hii, itabadilisha maisha yangu," alisema. "Katika Olimpiki, kila mtu ananitafuta mimi kuwawakilisha,'' anasema Perina Lokure Nakang anayeshiriki kwa mara ya kwanza kama mkimbizi katika Olimpiki.
Mwanariadha huyo wa asili ya Sudan Kusini mwenye umri wa miaka 21 anashiriki katika Michezo ya Olimpiki ya Paris, ana matumaini ya kuona wakimbizi zaidi kama yeye wanaweza kushindana katika Michezo hiyo.
Wanariadha hawa wamechukua nafasi kubwa katika Michezo ya Olimpiki ya Paris, shindano ambalo limesisitiza mada kama vile utofauti na ushirikishwaji wakati wa uhamiaji wa kihistoria wa kimataifa.
Olimpiki ya Paris 2024 imesajili wanariadha 37 wakimbizi wanaojiita Olympic Refugee Team.
Timu hiyo ya wakimbizi iliundwa mara ya kwanza katika Olimpiki ya 2016 huko Rio de Janeiro, kwa ushirikiano kati ya Kamati ya Kimataifa ya Olimpiki na UNHCR, ambapo wakati huo ilikuwa na wanariadha 10 pekee kutoka nchi nne tofauti.
''Timu hiyo ni ishara ya kujumuika, ya usawa, ya mafanikio kwa jamii kubwa duniani kote ya wakimbizi na watu waliokimbia makazi yao,'' Kamishna Mkuu wa Umoja wa Mataifa wa Wakimbizi Filippo Grandi, aliambia shirika la AP.
Sasa timu hiyo imeongezeka hadi kufikia wanariadha kadhaa ambao wamekimbia nchi 11 - kutoka Cuba hadi Afghanistan na Sudan Kusini.
Wanariadha wengi wakimbizi wa sasa na wa zamani wanaona jukwaa linalotolewa na Olimpiki kama muhimu katika msukumo mkubwa wa kuwapa wakimbizi utu huku mataifa kote ulimwenguni ikiwemo Ufaransa yakibana zaidi sheria za kutoa hifadhi.
