Wananchi wa Namibia wamemtaka rais wa Ujerumani kuharakisha mazungumzo juu ya fidia kwa mauaji ya kimbari ya wakati wa ukoloni yaliyofanywa na Wajerumani nchini Namibia.
Rais wa Ujerumani Frank-Walter Steinmeier alikuwa Windhoek, mji mkuu wa Namibia, kutoa heshima kwa mwenzake Hage Geingob, aliyefariki Februari 4 na atazikwa Jumapili.
Lakini alikumbushwa wakati wa ibada ya kumbukumbu siku ya Jumamosi kwamba Ujerumani bado haijakubaliana juu ya fidia kwa mauaji ya watu wa Herero na Nama kuanzia 1904 hadi 1908.
Mnamo Mei 2021, Ujerumani ilikubali kwamba mauaji yaliyofanywa na wanajeshi wake yalikuwa sawa na mauaji ya halaiki na imejitolea kufadhili miradi ya maendeleo kwa gharama ya euro bilioni 1.1 (dola bilioni 1.2) kwa miaka 30. Hakuna fedha zilizolipwa bado.
'Historia ya kutisha'
Kwa wananchi wengi wa Namibia, ikiwa ni pamoja na baadhi ya maafisa wakuu, ofa hiyo haitoshi na hailingani na fidia rasmi. Mazungumzo yanaendelea.
Ujerumani pia imekabiliwa na ukosoaji kutoka kwa Namibia kuhusu uungaji mkono wake kwa Israel, licha ya idadi kubwa ya vifo vya raia kutokana na mashambulizi yake yanayoendelea Gaza.
Moja ya hatua za mwisho za Geingob kabla ya kifo chake mapema mwezi huu akiwa na umri wa miaka 82 ilikuwa kuomboleza kile alichokiita "kutoweza kwa Ujerumani kupata mafunzo kutokana na historia yake ya kutisha."
Katika kumbukumbu hiyo, McHenry Venaani, kiongozi wa upinzani rasmi wa kisiasa wa Namibia, Popular Democratic Movement (PDM), alihutubia moja kwa moja Steinmeier.
'Mkataba wa heshima'
"Watu wetu wanatarajia kuona kesi ya Ujerumani ya Namibia ya mauaji ya kimbari ikitatuliwa," alisema.
"Unaporejea, kile kilicho kwenye meza ya mazungumzo kinaunda makubaliano ya heshima kwa niaba ya watu wetu. Inaunda mpango wa heshima ili tufunge sura hii."
Mkuu wa serikali ya Ujerumani Steinmeier alisema nchi yake imejitolea kuboresha uhusiano na Namibia.
“Njia ya upatanisho ambayo tumeianza takriban miaka kumi iliyopita haikuwa rahisi lakini kwa pamoja tumefika mbali sana na tunataka kufika mbali zaidi,” alisema.
Bado kuomba msamaha
Steinmeier alisema Geingob alimwambia mwishoni mwa mwaka jana kwamba alitaka kuweza kutia saini tamko la pamoja la Ujerumani na Namibia ili kuweka mstari chini ya mauaji ya kimbari.
"Na unajua, maridhiano sio kufunga yaliyopita, ni kuchukua jukumu kwa maisha yetu ya zamani na ni dhamira ya maisha bora ya baadaye," Steinmeier alisema wakati wa kumuenzi marehemu rais.
"Natumai nitaweza kurejea nchini hivi karibuni na chini ya hali tofauti kwa sababu nina hakika kwamba ni wakati mwafaka wa kuomba msamaha kwa watu wa Namibia."
