Jeshi la Jamhuri ya Kidemokrasia ya Kongo limeua zaidi ya wanajeshi 1,000 wa kikundi cha waasi wa Allied Democratic Forces (ADF) tangu kutangazwa kwa hali ya hatari katika eneo la Beni, Mkoa wa Kivu Kaskazini, alisema afisa mmoja Jumapili.
Msemaji wa jeshi eneo hilo, Kapteni Anthony Mualushayi, alisema kuwa mamia ya waasi pia wamekamatwa wakati wa operesheni hizo.
"Katika hali ya hatari inayoendelea, tumeendesha operesheni katika sehemu tofauti za eneo la Beni dhidi ya waasi wenye silaha wa ADF. Hadi sasa, tumewaua zaidi ya 1,000. Tumehesabu miili zaidi ya 1,000 katika maeneo saba ambapo tulikutana na waasi wa ADF," alisema Mualushayi katika taarifa kwa vyombo vya habari.
Alisema wamekamata waasi 702 wa ADF na washirika wao, ikiwa ni pamoja na raia wa Jordan, Pakistan, Kenya, na Afghanistan.
Hali ya hatari katika Mkoa wa Kivu Kaskazini ilianza tarehe 6 Mei 2021. Serikali ya Jamhuri ya Kidemokrasia ya Kongo iliitekeleza ili kuzuia waasi wa ADF kuua watu wasio na hatia katika vijiji vinavyozunguka misitu ambapo waasi hao wana makambi yao.
Waasi wa ADF wana asili ya Uganda, ambapo walikuwa wakitaka kuipindua serikali ya Rais Yoweri Museveni lakini walishindwa na jeshi la Uganda na kukimbilia misituni Mashariki mwa Jamhuri ya Kidemokrasia ya Kongo, ambapo wamekuwa wakiwashambulia raia na kuwaua.
