Meli ya kivita ya Misri imewasilisha sehemu kubwa ya pili ya silaha nchini Somalia zikiwemo bunduki za kukinga ndege na mizinga, maafisa wa bandari na kijeshi walisema siku ya Jumatatu, katika hatua ambayo huenda ikazua msuguano zaidi kati ya nchi hizo mbili na Ethiopia.
Uhusiano kati ya Misri na Somalia umeongezeka mwaka huu kutokana na kutoaminiana kwao kwa pamoja kwa Ethiopia, na kusababisha Cairo kupeleka shehena ya ndege kadhaa za silaha huko Mogadishu, mji mkuu wa Somalia, baada ya nchi hizo kutia saini makubaliano ya pamoja ya usalama mwezi Agosti.
Ethiopia iliikasirisha Mogadishu kwa kuafikiana makubaliano ya awali mwezi Januari na eneo lililojitenga la Somaliland kukodisha ardhi kwa ajili ya bandari kwa uwezekano wa kutambua uhuru wake kutoka kwa Somalia.
Misri, katika mzozo na Ethiopia kwa miaka mingi kuhusu ujenzi wa Addis Ababa wa bwawa kubwa la maji kwenye sehemu zinazotoka mto Nile, imelaani mpango wa Somaliland.
''Meli ya kivita ya Misri ilianza kupakua silaha hizo siku ya Jumapili,'' mwanadiplomasia mmoja alisema.
Vikosi vya usalama vilifunga kando ya barabara na barabara zinazozunguka siku ya Jumapili na Jumatatu wakati misafara ya silaha hizo zikipeleka kwenye jengo la wizara ya ulinzi na kambi za kijeshi zilizo karibu, wafanyakazi wawili wa bandari na maafisa wawili wa kijeshi waliambia Reuters.
Nasra Bashir Ali, afisa katika ofisi ya Waziri Mkuu wa Somalia Hamza Abdi Barre, alichapisha picha kwenye akaunti yake ya X ya Waziri wa Ulinzi Abdulkadir Mohamed Nur akitazama meli hiyo ikishushwa.
Somaliland ilikuwa na wasiwasi kwamba silaha zinaweza kutua katika mikono isiyofaa, ikiwa ni pamoja na kundi la al-Shabaab lenye uhusiano na al Qaeda, wizara yake ya mambo ya nje ilisema katika taarifa.
"Shehena ya msaada wa kijeshi wa Misri imewasili katika mji mkuu wa Somalia Mogadishu kusaidia na kujenga uwezo wa jeshi la Somalia," wizara ya mambo ya nje ya Misri ilisema katika taarifa yake siku ya Jumatatu.
Vyombo vya habari vya Misri viliripoti siku ya Jumapili kuwa ubalozi wa Misri mjini Mogadishu umewaonya raia wake wasisafiri hadi Somaliland, kutokana na hali ya usalama katika eneo hilo.
Mnamo Disemba 2023, Baraza la Usalama la Umoja wa Mataifa lilipiga kura kwa kauli moja kuondoa vikwazo vya mwisho vya silaha kwa serikali ya Somalia na vikosi vyake vya usalama, zaidi ya miaka 30 baada ya kuwekewa vikwazo vya silaha kwa mara ya kwanza nchini humo.
Baraza hilo liliiwekea vikwazo Somalia mwaka 1992 kupunguza mtiririko wa silaha kwa wababe wa kivita waliokuwa wakihasimiana, ambao walikuwa wamemuondoa dikteta Mohamed Siad Barre na kuitumbukiza nchi hiyo ya Pembe ya Afrika katika vita vya wenyewe kwa wenyewe.
