Matumaini ya Ghana kufuzu kwa Kombe la Mataifa ya Afrika 2025 yamedorora baada ya kujiondoa kwa wachezaji wanane muhimu kutokana na majeraha na sababu za kibinafsi.
Wachezaji hao ambao ni pamoja na Antoine Semenyo, Inaki Williams, Jonas Adjetey, Tariq Lamptey, Jerome Opoku, Alexander Djiku, Ibrahim Osman, na Joseph Painstil, walijiondoa kutokana na majeraha, wanasema mamlaka ya soka ya Ghana.
Mshambulizi wa Ghana Joseph Painstil, hata hivyo, alisemekana kujiondoa kwenye mechi za kufuzu kwa sababu za kibinafsi.
Kocha Otto Addo atahitaji kukikusanya kikosi chake kilichosalia ili kupata ushindi muhimu dhidi ya Angola na Niger katika mechi zijazo za kufuzu.
Nafasi zinazofifia
Kundi kuu la wachezaji, akiwemo Mohammed Kudus, Gideon Mensah, na Joseph Wollacott, wameanza mazoezi kwenye Uwanja wa Michezo wa Accra.
Ubora wa wachezaji waliojiondoa, ambao wengi wao wanacheza Ulaya, umewaacha mashabiki wa soka wa Ghana na wasiwasi huku wakihofia uwezekano wao wa kufuzu kwa fainali za AFCON unayeyuka taratibu.
Ghana kwa sasa inashika nafasi ya tatu katika Kundi F ikiwa na pointi mbili pekee, hivyo kufanya kufuzu kuwa kazi ngumu. Ushindi dhidi ya Angola siku ya Ijumaa na Niger Jumatatu ni muhimu kuweka matumaini yao hai.
Katika mitandao ya kijamii, baadhi ya mashabiki wanashuku kujiondoa kwa ghafla kwa wachezaji wote wanane ni uasi wa mshikamano na Painstil, ambaye mashabiki wanaamini kuwa huenda hana msimamo mzuri na kocha mkuu Otto Addo.
Mechi muhimu
Mashabiki wengine wanakisia kuwa huenda wachezaji hao wanapinga uchezaji mbaya wa timu hivi majuzi au wakionyesha kutoridhishwa na timu ya wakufunzi.
Shirikisho la Soka la Ghana linasema wachezaji wanane wameanza mazoezi katika Uwanja wa Michezo wa Accra, na kuanza maandalizi ya mechi muhimu ya kufuzu kwa Kombe la Mataifa ya Afrika 2025 dhidi ya Angola na Niger inayofanyika Ijumaa na Jumatatu ijayo, mtawalia.
Wachezaji wengine muhimu zaidi watawasili Jumatatu ili kuimarisha kikosi huku Kocha Otto Addo akiimarisha maandalizi ya kazi iliyo mbele yake.
Fainali zijazo za Kombe la Mataifa ya Afrika zitafanyika kati ya Desemba 21, 2025, na Januari 18, 2026, huku Morocco ikitarajiwa kuwa mwenyeji wa michuano hiyo katika miji sita.
Ghana ukingoni
Ghana wanaonekana kutoweza kufuzu katika Kundi F, wakiwa na pointi mbili pekee katika mechi zao nne za mwanzo.
Walifungwa 2-0 na Sudan katika duru ya hivi karibuni ya mechi na kushika nafasi ya tatu wakiwa na pointi mbili pekee—tano nyuma ya Sudan iliyo nafasi ya pili, huku Angola ikiwa tayari imefuzu kutoka Kundi F.
Black Stars lazima ishinde ugenini dhidi ya vinara Angola siku ya Ijumaa na nyumbani dhidi ya Niger siku tatu baadaye ili kuwa na matumaini yoyote ya kuipita Sudan iliyo nafasi ya pili na kufuzu kwa michuano ya 2025 nchini Morocco.
