Rais anayemaliza muda wake wa Ghana Nana Akufo-Addo ametangaza usafiri wa bila ya visa kwa wamiliki wote wa pasi za kusafiria kutoka Afrika kuanzia mwanzoni mwa mwaka huu, kuashiria hatua kuelekea ushirikiano wa kiuchumi wa bara hilo.
Tangazo hilo lilitolewa wakati wa hotuba yake ya taifa ya mwisho akizungumzia hali ya taifa huku akijiandaa kuachia ngazi Januari 6 baada ya mihula miwili ya uongozi.
"Ninajivunia kuidhinisha usafiri bila visa wa kuingia Ghana kwa wamiliki wote wa pasipoti wa Kiafrika, kuanzia mwanzoni mwa mwaka huu," Akufo-Addo alisema katika hotuba yake kwa bunge siku ya Ijumaa.
"Hii ni hatua inayofuata ya kimantiki kwa Eneo Huru la Biashara ya Bara la Afrika (AfCFTA) na ufanyaji kazi wa kambi kubwa zaidi ya biashara duniani," alisema.
"Haya yote ni mambo muhimu katika utekelezaji wa Ajenda ya 2063 ya AU, ambayo inatarajia kuwa na Afrika iliyounganishwa ifikapo 2063," aliongeza, akimaanisha mpango wa maendeleo wa Umoja wa Afrika kwa kipindi cha miaka 50.
Ghana inaungana na Rwanda, Ushelisheli, Gambia na Benin katika kutoa idhini ya kuingia bila viza kwa wasafiri wa Kiafrika.
Hapo awali Ghana ilikuwa imeruhusu raia wa mataifa 26 ya Afrika kuingia nchi hiyo bila visa na kupewa visa wanapowasili kwa wasafiri kutoka mataifa mengine 25, wakati nchi mbili pekee za Afrika - Eritrea na Morocco - zilihitaji visa kabla ya kuingia.
Sera ya kutokuwa na visa inajengwa juu ya juhudi za Ghana kuimarisha sifa yake ya kimataifa, hasa kupitia mipango kama vile "Year of Return 2019", ambao ulisherehekea Waafrika walioko ugenini na kuadhimisha miaka 400 tangu biashara ya utumwa iliyovuka Atlantiki.
Kampeni hiyo ilivutia maelfu ya wageni, wakiwemo watu mashuhuri, nchini Ghana na kupelekea baadhi yao kupokea uraia, na hivyo kuimarisha hadhi ya nchi hiyo kama kitovu cha kitamaduni na utalii.
Uchumi wa Ghana unarudi
Akufo-Addo pia alitumia hotuba yake ya mwisho kupigia debe maendeleo ya kiuchumi chini ya uongozi wake, akitaja ongezeko la akiba ya kimataifa ya Ghana hadi dola bilioni 8, kutoka dola bilioni 6.2 mwaka 2017, na ukuaji mkubwa wa Pato la Taifa mwaka 2024.
"Ukuaji wa uchumi umerejea katika mwelekeo wa kabla ya Covid," alisema, akionyesha kiwango cha ukuaji wa asilimia 6.3 kwa 2025.
"Ninaiacha Ghana ambayo inastawi, ambayo imekabiliana na changamoto kubwa za kimataifa kwa ukakamavu wa ajabu, ambao uchumi wake unazidi kuimarika, na ambao taasisi zake zinafanya kazi kwa ufanisi," alisema.
Taifa hilo la Afrika Magharibi lenye utajiri wa mafuta na dhahabu ni mojawapo ya nchi zenye demokrasia imara zaidi barani Afrika.
Tangu 2022, imekuwa ikipambana na moja ya migogoro yake mbaya zaidi ya kiuchumi katika miongo kadhaa na kwa sasa iko chini ya mpango wa msaada wa Mfuko wa Fedha wa Kimataifa wa $ 3-bilioni.
Rais anayemaliza muda wake anakabidhi madaraka kwa John Mahama, ambaye alishinda uchaguzi wa Desemba.
