Siku ya Jumatano, Wizara ya Afya ya Burundi ilitangaza mlipuko wa kipindupindu katika sehemu ya magharibi ya nchi, ambayo inakumbana na uhaba wa maji.
"Tayari tumerekodi visa zaidi ya 15 vya kipindupindu. Wagonjwa wa kipindupindu wote wamehudumiwa katika vituo vya matibabu ya kipindupindu (CTC) vilivyoko katika hospitali ya manispaa ya Bujumbura na katika vituo vingine vya afya," Sylvie Nzeyimana, Waziri wa Afya ya Umma, alisema kwa TRT Afrika.
Bi Nzeyimana aliwaomba maafisa wa afya na wakazi katika maeneo yaliyoathiriwa ya Bujumbura, Gatumba, na Rugombo, pamoja na wadau wote, kujitokeza katika mapambano dhidi ya kipindupindu.
Pia aliwaomba raia, haswa wakazi wa maeneo yaliyoathiriwa, kufuata hatua za usafi kwa kunawa mikono yao kwa sabuni na maji.
Uhaba mkubwa wa maji safi ya kunywa unadhaniwa kuwa chanzo cha mlipuko huu, ambao umetokea katika sehemu ya magharibi ya Burundi, haswa wakati wa kipindi kavu kuanzia Mei hadi Septemba.
Mwanzoni mwa mwaka, kipindupindu kilisababisha vifo vya watu wawili katika wilaya ya afya ya Bujumbura, haswa kwenye ufukwe wa Kajaga, kando ya Ziwa Tanganyika.
Kulingana na Shirika la Afya Duniani (WHO), kati ya Juni na Novemba 2019, angalau visa 1,064 vya kipindupindu vilirekodiwa, ikiwa ni pamoja na vifo sita (matano Bujumbura).
Kulingana na Madaktari Wasio na Mipaka, MSF, kipindupindu huathiri wastani wa watu 200 hadi 250 kila mwaka nchini Burundi, na kila baada ya miaka mitano hadi sita nchi hiyo hushuhudia ongezeko la visa.
