Naibu Waziri wa Mambo ya Nje wa Uturuki Ahmet Yildiz amesisitiza kuwa hakuwezi kuwa na uhalali wa "adhabu ya pamoja" ya raia wa Palestina na Israel huko Gaza.
Katika kikao cha Baraza la Usalama la Umoja wa Mataifa, Yildiz alisisitiza kwamba watu wa Palestina huko Gaza, yenye wakazi milioni 2.5 waliominywa katika eneo dogo, wanavumilia mashambulizi ya mara kwa mara na ya kiholela.
"Wengine wanapendelea kufumbia macho ukatili huo. Wanapendelea kutozungumza juu ya uhalifu dhidi ya ubinadamu na uhalifu wa kivita. Wanapendelea kujifanya kana kwamba watu wa Palestina ni idadi tu na hawana utu na haki," alisema. "Hii haikubaliki kabisa."
Alishutumu kama "unafiki mtupu na mfano halisi wa viwango viwili, vinavyounda sababu kuu ya shida tunayokabili leo."
"Ikiwa tutaendelea kufuata njia hiyo hiyo, matatizo ya leo kati ya Israel na Palestina yataongezeka tu," alisema, akitaka hatua za haraka zichukuliwe kuzuia mzozo huo kusambaa katika eneo hilo kubwa na kwingineko.
Yildiz alielezea hamu ya uturuki ya kusitisha mapigano kupitia usitishaji mapigano wa mara moja, usio na masharti na wa kudumu pamoja na mtiririko usiozuiliwa wa usaidizi wa kibinadamu huko Gaza.
"Pande hizo mbili, Israel na Palestina, lazima ziletwe pamoja ili kukubaliana juu ya suluhu ya mataifa mawili, kuishi bega kwa bega katika mipaka salama na kabla ya 1967, Jerusalem Mashariki ikiwa mji mkuu wa Jimbo la Palestina," aliongeza.
Naibu waziri huyo alisisitiza kuwa jukumu la kusitisha "umwagaji damu na kuanzisha mchakato wa amani wenye maana lipo, kwanza kabisa, na Baraza la Usalama.
“Tunalitaka Baraza kukomesha tabia ya kutojali mauaji haya yanayoendelea ambayo hayawezi kuwa na nafasi katika karne hii ya 21,” alisema.
Israel imeendeleza kampeni ya mashambulizi ya mara kwa mara huko Gaza kufuatia shambulio la kuvuka mpaka la kundi la Hamas la Palestina kwenye miji ya mpakani ya Israel tarehe 7 Oktoba.
Takriban Wapalestina 5,800 wameuawa huko Gaza tangu mashambulizi hayo yaanze, wakiwemo zaidi ya watoto 2,000, kwa mujibu wa Wizara ya Afya yenye makao yake makuu Gaza.
Zaidi ya Waisraeli 1,400 pia wameuawa katika mzozo huo.
