Mshindi wa Kombe la Dunia la Ufaransa Paul Pogba anakabiliwa na uwezekano wa kufungiwa kwa muda mrefu baada ya mahakama ya Italia inayopambana na matumizi ya dawa za kuongeza nguvu mwilini kutaka kiungo huyo wa Juventus afungiwe kwa miaka minne.
"Ninaweza kuthibitisha kwamba tulipokea arifa hii asubuhi kutoka kwa wakala wa kupambana na dawa za kusisimua misuli na kuomba kusimamishwa kwa miaka minne," chanzo cha klabu ya Juventus kiliiambia AFP Alhamisi jioni.
Pogba, 30, alisimamishwa kwa muda mwezi Septemba baada ya kukutwa na testosterone.
Mwezi mmoja baadaye, sampuli ya B ilithibitisha uwepo wa dutu hii.
Shughuli za mfumo wa haki za michezo wa Italia zinaendelea, huku ofisi ya mwendesha mashtaka wa umma wa Turin pia imeanza uchunguzi wa mahakama, kwani dawa za kuongeza nguvu ni kosa la jinai nchini Italia.
Masuala ya nje ya uwanja
Pendekezo kutoka kwa mahakama hiyo ni masuala ya hivi punde zaidi ndani na nje ya uwanja kwa Pogba.
Kutoka kuwa juu ya ulimwengu Pogba ameshuka polepole hadi chini, akiharibiwa na majeraha na maisha magumu ya kibinafsi.
Mnamo Machi 2022, wavamizi, ambao ni pamoja na marafiki wa utotoni, walivamia nyumba ya Pogba na kumshikilia kinyume na matakwa yake, wakidai euro milioni 13 ($ 14 milioni).
Pogba aliishia kulipa euro 100,000 za kiasi hicho na jambo hilo lilimfundisha kuwa "watu pekee wanaoweza kukuangamiza ni watu walio karibu nawe".
Majeraha
Tatizo la goti lilimfanya akosekane kwenye Kombe la Dunia la 2022 huku kocha wa Ufaransa Didier Deschamps akisema anatumai mchezaji huyo "atagundua tena tabasamu lake".
Mwezi mmoja baada ya kupata jeraha hilo, kaka yake Mathias alitoa video ambayo alitishia kufichua siri juu ya ndugu yake huyo maarufu.
Juve pia wamesitisha malipo ya wastani wa mshahara wake wa kila mwaka wa euro milioni 8 (dola milioni 8.4).
