Mvutano wa kisiasa ulikuwa mkubwa nchini Comoro siku ya Jumatatu, huku visa vya ghasia vikiripotiwa siku moja baada ya taifa hilo la kisiwa cha Bahari ya Hindi kupiga kura ya urais.
Visiwa hivyo vinasubiri matokeo rasmi ya uchaguzi wa duru ya kwanza ya Jumapili, ambayo inatarajiwa kuonyesha kiongozi aliye madarakani Rais Azali Assoumani akiwa na idadi kubwa zaidi ya kura.
Lakini wafuasi wa wagombea watano wa upinzani wameshutumu mamlaka za uchaguzi kwa kuchelewesha upigaji kura katika ngome zao za uchaguzi na kuwanyanyasa waangalizi wa upigaji kura.
Matokeo ya duru ya kwanza yanatarajiwa wakati wowote wiki hii, lakini hali ya wasiwasi tayari inaongezeka katika visiwa vitatu vya Comoro - Grande-Comore, Anjouan na Moheli - vyenye wakaazi zaidi ya 870,000.
Mapinduzi ya serikali
Nchi hiyo imekabiliwa na zaidi ya mapinduzi 20 au majaribio ya mapinduzi tangu ilipopata uhuru wake kutoka kwa Ufaransa mwaka 1975, lakini kumekuwa na ripoti chache tu za ghasia wakati wa kura ya mwaka huu.
Katika mji mkuu wa Moroni, uliokumbwa na mvua kubwa, maisha ya mtaani yalikuwa yamerejea kawaida kufikia Jumatatu.
Lakini ripoti kutoka kisiwa cha Anjouan, ambacho ni ngome ya upinzani, zilisema kuwa vijana wameingia mitaani kupinga marufuku ya maandamano.
Gavana wa Anjouan Anissi Chamsidine, akizungumza na AFP kwa njia ya simu, alikashifu kile alichosema ni "ukiukwaji wa uwazi na haki" ambao ulidhoofisha kura hiyo.
Mabomu ya machozi
Pamoja na mvutano mitaani, gavana huyo alisema, "milipuko" imesikika huko Mutsamudu, mji alikozaliwa rais wa zamani Ahmed Abdallah Sambi.
Wanachama wawili wa chama cha Abdallah Sambi cha Juwa waliliambia shirika la habari la AFP kuwa kundi lililokusanyika katika makao yao makuu lilishambuliwa kwa mabomu ya machozi na kwamba vikosi vya usalama vililipua maguruneti kutawanya umati wa watu.
Moheli, kisiwa kidogo cha tatu miongoni mwa visiwa hivyo, kilicho na wapiga kura 25,000 tu, pia ilikuwa na wasiwasi.
Mgombea wa upinzani wa ugavana wa Moheli, Abdoulanziz Hassanaly, aliambia AFP kwamba anashuku chama tawala kitajaribu kumtangaza mgombea wake mshindi baada ya duru ya kwanza pekee.
Jeshi 'limetumwa'
Alidai kuwa mkurugenzi wake wa kampeni alijeruhiwa na vikosi vya usalama wakati akiandaa maandamano katika tume ya uchaguzi, na akatangaza: "Idadi ya watu iko mitaani."
Mwanamke mwenye umri wa miaka 25 kutoka Moheli, ambaye hakutaka jina lake litajwe, aliiambia AFP kwamba jeshi liliwekwa kwa nguvu katika mji mkuu wa kisiwa hicho Fomboni lakini "raia wamefunga barabara."
