Maji ya mafuriko kutoka kwa bwawa lililofurika yameharibu makumi ya nyumba huko Maiduguri, mji mkuu wa jimbo la Borno kaskazini mashariki mwa Nigeria, huku maafisa wa dharura wakihofia hali inaweza kuwa mbaya zaidi.
Video na picha kadhaa za angani zilizoshirikiwa na Shirika la Kitaifa la Kusimamia Dharura (NEMA) na AFP zilionyesha safu za nyumba zikiwa zimezama kwenye maji ya matope.
Kitovu cha uasi wa zaidi ya muongo mmoja, Maiduguri ni kitovu cha majibu ya mzozo wa kibinadamu katika eneo la kaskazini mashariki.
Shirika la Umoja wa Mataifa la kuhudumia wakimbizi nchini Nigeria (UNHCR) lilisema kwenye akaunti yake ya X kwamba ndilo mafuriko mabaya zaidi kuwahi kutokea katika mji huo katika kipindi cha miaka 30.
'Haijawahi kutokea'
"Ni tukio ambalo halijawahi kushuhudiwa," msemaji wa NEMA Ezekiel Manzo aliambia AFP siku ya Jumanne. "Baadhi ya maeneo ya kati ya jiji ambayo hayajashuhudia mafuriko kwa miaka mingi yanashuhudia leo."
Mafuriko hayo pia yaliharibu ofisi ya posta ya jiji na mbuga kuu ya wanyama, huku mamlaka ikionya kuwa "wanyama hatari wamesombwa na maji hadi kwenye jamii zetu (sic)."
Manzo alisema utabiri haukuwatayarisha wafanyikazi wa dharura kwa kiwango cha mafuriko, huku pia akilaumu athari za mabadiliko ya hali ya hewa kwa "janga".
Ameliambia shirika la habari la AFP kuwa kulikuwa na vifo kutokana na tukio hilo lakini akakataa kutoa idadi maalum huku waokoaji wakiendelea na shughuli za uokoaji katika maeneo yaliyoathirika.
Makazi ya muda
Huku mafuriko yangali "ya juu katika maeneo mengi ya jiji", mamlaka imefungua "makazi ya muda" matatu kwa waathiriwa.
Nyumba zimezama, shule zimefungwa na biashara kulemazwa huku watu wakihama na mali zao," UNCHR Nigeria ilisema.
Mafuriko yamesababisha vifo vya takriban watu 201 na wengine 225,000 wamelazimika kuyahama makazi yao katika maeneo ya nchi lakini haswa katika eneo la kaskazini kufikia Septemba 3.
Wengi wa waliofariki walikuwa katika eneo la kaskazini mwa nchi hiyo.
Uhaba wa chakula
Msemaji huyo wa NEMA aliiambia AFP mwishoni mwa mwezi uliopita kwamba maeneo ya kati na kusini mwa Nigeria huenda yakaathirika zaidi huku mvua ikizidi.
Angalau hekta 115,000 (ekari 285,000) za mashamba pia zimeathirika, takwimu za NEMA zilionyesha.
Uharibifu wa mashamba utazidisha viwango vya juu vya uhaba wa chakula nchini Nigeria, Save the Children ilionya wiki iliyopita.
"Mtoto mmoja kati ya sita kote Nigeria alikabiliwa na njaa mwezi Juni-Agosti mwaka huu - ongezeko la 25% katika kipindi kama hicho mwaka jana, NGO ilisema katika taarifa.
Mahitaji ya kibinadamu
Mafuriko, ambayo kwa kawaida husababishwa na mvua nyingi na miundombinu duni, yamesababisha uharibifu mkubwa katika nchi hiyo yenye watu wengi zaidi barani Afrika hapo awali.
Zaidi ya watu 360 walikufa na zaidi ya milioni 2.1 walikimbia makazi yao mnamo 2012.
Mnamo 2022, zaidi ya watu 500 walikufa na milioni 1.4 walilazimika kuyahama makazi yao katika mafuriko mabaya zaidi katika muongo mmoja.
Ofisi ya Rais Bola Tinubu ilisema inafanya kazi na mamlaka za serikali "kushughulikia mahitaji ya haraka ya kibinadamu ya watu walioathirika."
