Chama cha Wasanii cha Nigeria kimesitisha uzalishaji wa filamu zote zilizofanyika katika maeneo ya kingo za mito kote nchini na filamu zinazohusisha safari za boti kufuatia ajali ya boti iliyosababisha kifo cha muigizaji maarufu wa Nigeria, Junior Pope.
Junior Pope, ambaye jina lake halisi ni John Paul Odonwodo, alizama wakati wa kurekodi filamu huko Asaba, mji mkuu wa Jimbo la Delta, mchana wa Jumatano, Aprili 10, 2024.
Chama cha Wasanii wa Nigeria (AGN), katika taarifa, ilisema, “Kufuatia tukio la kusikitisha la ajali ya boti iliyochukua maisha ya Junior Pope na wafanyakazi wengine watatu wa kikundi hicho katika eneo la ufukweni wa Mto Niger Cable Point Asaba tarehe 10 Aprili, filamu zote zinazohusisha maeneo ya kingo za mito na safari za boti zimesitishwa kwa muda usiojulikana.
Tukio hilo lilitokea masaa machache baada ya Pope kurekodi video yake kwenye ukurasa wake wa Instagram, akiendesha boti ya mbao bila koti la uokoaji, kwa ajili ya eneo katika filamu ‘The Other Side of Life’.
Pope alipandisha video kwenye Instagram ambapo anaonekana akikaa katika boti inayokwenda kasi bila koti la uokoaji.
“Niangalia mimi. Hatari tunazochukua kuburudisha. Nikivuka mto 9ja jana bila koti la uokoaji. Na wahoooooo. Nani hufanya hivyo?" Junior Pope aliandika maneno chini ya video.
AGN ilisema utengenezaji filamu kote nchini utasitishwa siku ya Alhamisi, Aprili 11, 2024, kwa heshima ya waathirika.
Bado hakuna ufafanuzi wazi kuhusu kilichosababisha ajali hiyo.
“Tunapoendelea kutafuta miili ya watu waliobaki, roho zao zipumzike kwa amani.”
Tukio hilo linajiri kufuatia msururu wa vifo ambavyo vimeikumba tasnia ya filamu ya Nigeria mwaka huu.
Mchekeshaji maarufu wa Nigeria na muigizaji John 'Mr. Ibu' Okafor alifariki mnamo Machi 2, wakati mwigizaji mwingine mkongwe, Amaechi Muonagor, alifariki mnamo Machi 24.
Muigizaji maarufu wa filamu za Nigeria, Saratu Gidado Daso, pia alifariki akiwa na umri wa miaka 56 mnamo Aprili 9, 2024.
