Rais wa Sierra Leone Julius Maada Bio ameongoza katika uchaguzi wa rais uliofanyika Jumamosi.
Matokeo ya muda yalionyesha kuwa mgombea huyo alikuwa akiongoza uchaguzi wa urais kwa asilimia 60 ya kura zilizohesabiwa, tume ya uchaguzi ilisema Jumatatu.
"Matokeo yaliyoelezwa hapa ni ya awali tu na hayawakilishi matokeo kamili ya uchaguzi wa urais," ilisema katika taarifa.
Rais Bio hadi sasa amepata kura 1,067, 666 huku mpinzani wake wa karibu, kiongozi wa upinzani Samura Kamara, amepata kura 793,751 kulingana na matokeo ya muda.
Mshindi wa uchaguzi huo lazima apate hatimaye asilimia 55 ya kura halali zilizopigwa, la sivyo, kutakuwa na duru ya pili kati ya wagombea wawili wa juu wiki mbili baada ya matokeo kutangazwa.
Rais anatafuta muhula wa pili na wa mwisho madarakani. Jumla ya wagombea 13 wa urais walikuwa kwenye kura.
Zaidi ya watu milioni tatu wameandikishwa kama wapiga kura katika nchi hiyo ya Afrika Magharibi.
Mapema Jumatatu, polisi walirusha mabomu ya machozi nje ya makao makuu ya chama kikuu cha upinzani, All People's Congress, katika mji mkuu wa Freetown.
Wafuasi wa upinzani walikuwa wameandamana katika jiji hilo "kutangaza kwa umma kwamba wameshinda" uchaguzi, polisi walisema katika taarifa.
