Mamlaka ya Libya imewakamata maafisa kadhaa wa forodha kwa kujaribu kusafirisha nje ya nchi takriban tani 26 za dhahabu zenye thamani ya karibu euro bilioni 1.8 (dola bilioni 1.9), waendesha mashtaka walisema
Ofisi ya mwendesha mashitaka wa Libya haikueleza kwa undani chanzo kinachoshukiwa cha kiasi kikubwa cha madini hayo ya thamani kubwa kuliko hifadhi ya taifa ya dhahabu ya nchi nyingi.
Mamlaka huko Misrata, magharibi mwa Libya, walikamata watu hao kuhusiana na operesheni ya usafirishaji haramu wa binadamu katika uwanja wa ndege wa kimataifa wa mji huo wa bandari, ofisi hiyo ilisema Jumapili usiku.
"Mamlaka za uchunguzi ziliamuru kukamatwa kwa mkurugenzi mkuu wa forodha na maafisa wa forodha katika uwanja wa ndege wa kimataifa wa Misrata," ilisema katika taarifa iliyotolewa kwenye Facebook siku ya Jumatatu.
Benki kuu pekee ndiyo inaweza kuuza nje dhahabu
Mnamo Desemba 2023, maafisa walijaribu kusafirisha dhahabu zenye uzito wa kilo 25,875, ambazo kwa sasa zina thamani ya karibu euro bilioni 1.8, ilisema taarifa hiyo.
Sheria ya Libya inasema benki kuu pekee ndiyo inaweza kuuza nje dhahabu, ilisema ofisi hiyo, ambayo ilifungua uchunguzi wa kesi hiyo mwezi Januari.
Libya imekumbwa na misukosuko ya kisiasa tangu kupinduliwa na kuuawa kwa mtawala wa muda mrefu Muammar Gaddafi mwaka 2011.
Nchi hiyo imegawanyika kati ya serikali ya Abdelhamid Dbeibah inayotambuliwa na Umoja wa Mataifa mjini Tripoli na utawala hasimu wa mashariki, unaoungwa mkono na Khalifa Haftar.
Njia ya usafiri
Misrata, mashariki mwa mji mkuu Tripoli, ilichukua jukumu muhimu katika kupambana na vikosi vya Gaddafi, na vile vile dhidi ya watu wenye itikadi kali mwaka 2016.
Kundi lisilo la kiserikali lenye makao yake makuu nchini Marekani la The Sentry, ambalo linachunguza biashara haramu katika maeneo yenye migogoro, lilisema kuwa Libya imekuwa kitovu kikuu cha biashara haramu ya dhahabu katika muongo mmoja uliopita.
"Hasa tangu 2014, Libya imekuwa ikitumika kama eneo la kupita kuelekea maeneo kama vile UAE" kwa usafirishaji wa dhahabu, kulingana na ripoti ya kikundi iliyochapishwa Novemba mwaka jana.
"Njia mbili muhimu za usafiri zinatumika kusafirisha dhahabu nje ya nchi kwa misingi isiyo halali: bandari na viwanja vya ndege vya eneo la Misrata-Zliten-Khums na vile vya Benghazi" mashariki, ripoti hiyo ilisema.
