Upigaji kura ulifungwa katika vituo vingi vya kupigia kura kote Sierra Leone na kuhesabu kura kulianza muda mfupi baadaye Jumamosi.
Kwa baadhi ya vituo vilivyochelewa kufunguliwa kutokana na kuchelewa kuwasili kwa vifaa vya kupigia kura, zoezi liliongezewa muda zaidi ya saa kumi na moja jioni.
Foleni ndefu zilishuhudiwa kutwa nzima katika vituo vingi vya kupigia kura katika uchaguzi mkuu.
Katika mji mkuu wa nchi hiyo Freetown, wapiga kura kadhaa walilalamikia huduma za polepole za tume ya uchaguzi, na kuwalazimu kutumia muda mrefu kwenye foleni.
Madai ya udanganyifu yaliibuka katika baadhi ya vituo vya kupigia kura, lakini mamlaka iliingia haraka ili kutuliza mvutano.
Zoezi la upigaji kura kwa kiasi kikubwa lilikuwa la amani, huku miji yenye shughuli nyingi ikisalia bila watu.
Inakisiwa kuwa uchaguzi wa rais na wabunge utavutia ushindani wa hali ya juu miongoni mwa washindani, huku kukiwa na wito wa kimataifa wa amani na mzozo wa gharama ya maisha ambao ulizua ghasia mbaya mwaka 2022.
Sierra Leone, ambayo haikuwahi kujikwamua kiuchumi kutokana na vita vya wenyewe kwa wenyewe vya 1991-2002 na janga la Ebola muongo mmoja baadaye, iliathirika zaidi na janga la Covid-19 na kuanguka kwa vita nchini Ukraine
Uchaguzi wa Rais
Wanaume kumi na wawili na mwanamke mmoja wanawania nafasi hiyo ya juu, lakini mpinzani mkuu wa Rais aliye madarakani Julius Maada Bio ni Samura Kamara wa chama cha All People's Congress (APC).
Wawili hao watachuana kwa mara ya pili mfululizo baada ya Bio, wa Sierra Leone People's Party (SLPP), kumshinda kwa karibu Kamara katika duru ya pili ya mwaka 2018.
Kupanda kwa bei ya vyakula ni suala muhimu kwa wapiga kura wengi katika taifa hilo la Afrika Magharibi linalotegemea uagizaji wa bidhaa za watu milioni nane.
