Ted Kaczynski, maarufu kama "Unabomber," ambaye aliwatia hofu Wamarekani kuanzia mwaka 1978 hadi 1995 na kampeni yake ya mabomu ya kiholela na ya kutotambulika, amefariki gerezani kulingana na mamlaka ya Marekani.
Kaczynski, mwenye umri wa miaka 81, ambaye mashambulizi yake yalisababisha vifo vya watu watatu na kujeruhi wengine ishirini na mbili, alifariki katika kituo cha matibabu cha gereza la shirikisho huko Butner, North Carolina, kulingana na Idara ya Magereza ya Shirikisho.
Mtaalamu huyo wa hesabati aliyesomea Harvard, ambaye aliwalenga wasomi na raia wasio na hatia, alikuwa na lengo la kujaribu kusitisha maendeleo ya teknolojia na jamii ya kisasa, akitekeleza kampeni yake ya vurugu kutoka kwenye kibanda chake katika maeneo ya vijijini ya Montana.
Mabomu yake yalikuwa yamekabidhiwa kwa mkono au kutumwa kwa barua kwa miongo kadhaa, hivyo kuwafanya wachunguzi washindwe kumkamata.
Ni baada tu ya kukamatwa kwa Kaczynski na kufichuliwa kwa utambulisho wake ndipo FBI iligundua maisha yake ya awali, ambapo alipata alama 167 kwenye mtihani wa IQ na kuingia chuo kikuu akiwa na umri wa miaka 16 tu.
Jina la utani "Unabomber" lilitokana na kushambulia waalimu wa vyuo vikuu na kampuni za ndege, hivyo FBI kumtaja kuwa "Bomber wa Vyuo vikuu na Ndege."
Kuanguka kwa Unabomber
Mwezi Septemba 1995, alichapisha waraka wake wa maneno 35,000 kupinga uendelezaji wa kisasa katika gazeti la The Washington Post, kwa kutoa ahadi kuwa atasitisha kampeni yake ya mabomu ikiwa watauchapisha.
Lakini waraka huo ulisababisha kugunduliwa kwake. Baada ya kusoma waraka huo, ndugu yake aliyekuwa amefarakana naye, David, alidhani angeweza kumjua mwandishi, na akatoa taarifa kwa FBI juu ya shaka zake kwamba Ted Kaczynski huenda ndiye mtu waliyekuwa wakimtafuta.
Baada ya kukamatwa kwake mwaka 1996, Kaczynski alihukumiwa kifungo cha maisha gerezani mwaka 1998. Wakati mawakili wake walipojaribu kutoa hoja ya kuwa ni mwendawazimu, mahakama ilikataa ombi lao.
Kaczynski alikiri kosa, ambalo lilimsaidia kuepuka adhabu ya kifo.
Daktari wa akili aliyemhoji Kaczynski gerezani alimtambua kuwa na shida ya akili ya wazimu.
"Mawazo ya Bwana Kaczynski kwa kiasi kikubwa yanahusiana na mateso," Sally Johnson aliandika katika ripoti ya kurasa 47. "Mada kuu ni imani yake kuwa anadhalilishwa na kuteswa na wanafamilia na jamii ya kisasa."
Alikuwa amefunwa kwa muda mrefu katika gereza lenye usalama mkubwa huko Colorado, ambalo pia lilikuwa likishikilia watu kama mfalme wa madawa El Chapo, kabla ya kuhamishiwa mwaka 2021 katika kituo cha afya huko North Carolina.
