China siku ya Jumatano iliiambia Marekani kuwa uhusiano wa nchi hizo mbili unakabiliwa na "matatizo mapya," na kuitaka Washington "ikomeshe kuingilia" mambo yake ya ndani.
Ilikuja wakati wa mazungumzo ya simu kati ya Diwani wa Jimbo la China, Waziri wa Mambo ya Nje Qin Gang na Waziri wa Mambo ya Nje wa Marekani Antony Blinken, ilisema Wizara ya Mambo ya Nje ya China.
"Tangu mwanzo wa mwaka, mahusiano ya jamuhuri ya china na Marekani yamekumbana na matatizo na changamoto mpya, na jukumu liko wazi," Qin alimwambia mwenzake wa Marekani.
"Marekani inahimizwa kuchukua hatua za kivitendo kutekeleza maafikiano muhimu yaliyofikiwa na wakuu hao wawili wa nchi na ahadi husika zilizotolewa na Marekani na kudhibiti ipasavyo tofauti na kurudisha uhusiano kati ya China na Marekani kwenye mstari wa maendeleo yenye afya na utulivu," Qin alinukuliwa kutoka Beijing.
Akifafanua msimamo thabiti wa China kuhusu masuala ya msingi ikiwa ni pamoja na Taiwan, waziri wa mambo ya nje wa China alisisitiza kwamba Marekani "inapaswa kuacha kuingilia mambo ya ndani ya China, na kuacha kuathiri maslahi ya usalama na maendeleo ya China kwa jina la ushindani."
Simu hiyo ilikuja huku kukiwa na ripoti ambazo hazijathibitishwa za ziara ya Blinken huko Beijing. Ombi la simu hiyo lilitoka Washington, Beijing ilisema.
"China daima imekuwa ikitazama na kushughulikia uhusiano kati ya China na Marekani kwa mujibu wa kanuni za kuheshimiana, kuishi pamoja kwa amani, na ushirikiano kama ilivyotolewa na Rais Xi Jinping," alisema Qin.
Washington inapaswa kuheshimu masuala ya msingi ya Beijing, "kuacha kuingilia mambo ya ndani ya China, na kuacha kudhoofisha mamlaka ya China, usalama na maslahi ya maendeleo kwa jina la ushindani," Qin alisema zaidi.
Blinken alisema kupitia ukurasa wake wa Twitter kwamba alijadiliana na Qin "juhudi zinazoendelea za kudumisha njia wazi za mawasiliano pamoja na maswala ya nchi mbili na ya kimataifa."
