Nigeria imekanusha madai kwamba inakula njama na Ufaransa "kuvuruga" nchi jirani ya Niger.
"Madai haya yapo tu katika uwanja wa mawazo, kwani Nigeria haijawahi kujihusisha na muungano wa wazi au wa siri na Ufaransa - au nchi nyingine yoyote - kufadhili mashambulizi ya kigaidi au kuyumbisha Jamhuri ya Niger kufuatia mabadiliko ya kidemokrasia katika uongozi wa nchi hiyo," Waziri wa Habari na Mwelekeo wa Kitaifa wa Nigeria Mohammed Idris alisema katika taarifa yake siku ya Alhamisi.
Sehemu ya video ya Rais wa mpito wa Niger, Jenerali Abdourahamane Tchiani, imedai kulikuwa na mipango ya Ufaransa kwa kushirikiana na Nigeria kuvuruga Niger na mipango yake.
Katika video hiyo ambayo haikuwa na tarehe, Jenerali Tchiani alidai kuwa Ufaransa inapanga kuanzisha "kituo cha operesheni ya kigaidi" katika jimbo la kaskazini magharibi la Sokoto nchini Nigeria.
Tchiani amedai kwamba Ufaransa ilikuwa ikitoa msaada wa kifedha kwa Nigeria ili kuweka kambi ya kijeshi katika jimbo la kaskazini mashariki la Borno "chini ya kisingizio cha kupambana na ugaidi."
Mtawala huyo wa kijeshi alisema Niger imepata taarifa za kijasusi za kuaminika kuhusu mipango hiyo inayodaiwa, ikiwa ni pamoja na juhudi za kuhujumu bomba la mafuta la Niger na kilimo.
Hata hivyo, Nigeria, kupitia Wizara yake ya Habari, imesema "imesalia na nia ya kuendeleza amani, utangamano na uhusiano wa kihistoria wa kidiplomasia na Niger."
Waziri wa Habari Idris aliongeza kuwa jeshi la Nigeria "linafanikiwa kukomesha ugaidi ndani ya eneo (kaskazini)" na kwa hivyo itakuwa "upuuzi kupendekeza kwamba Nigeria ingepanga njama na nguvu yoyote ya kigeni kudhoofisha amani na usalama wa nchi jirani."
"Serikali ya Nigeria au afisa wake yeyote hakuna ambaye amewahi kushiriki katika kuwapa silaha au kuunga mkono kundi lolote la kigaidi kushambulia Jamhuri ya Niger," Idris aliongezea.
Uhusiano uliotikisika kati ya Nigeria na Niger unakuja baada ya Niger, pamoja na Burkina Faso na Mali, kukata uhusiano na jumuiya ya kanda ya Afrika Magharibi, ECOWAS, ambayo kwa sasa iko chini ya uenyekiti wa Rais wa Nigeria Bola Tinubu.
