‘Yansandan Kenya sun yi amfani da hayaƙi mai sa hawaye a ranar Talata domin tarwatsa daruruwan masu zanga-zangar adawa da Faransa da suka yi ƙoƙarin isa cibiyar taruka ta Kenyatta International Convention Centre (KICC) a Nairobi, inda ake gudanar da taron Africa Forward Summit.
Masu zanga-zangar, ciki har da wasu ‘yan ƙasashen waje, sun taru ne a titin Uhuru Highway ɗauke da jajayen tutoci da allunan nuna adawa da mulkin mallaka, kafin jami’an ‘yansanda masu yaki da tarzoma su tare su tare da hana su isa wajen taron da ke cike da tsauraran matakan tsaro.
Bidiyoyi daga wajen sun nuna yadda ‘yansanda ke korar masu zanga-zangar ta wasu sassan tsakiyar birnin yayin da hayaki mai sa hawaye ya mamaye sararin samaniya. An kuma ga jami’an tsaro suna tura wasu masu zanga-zangar cikin motocin ‘yansanda yayin samamen.
Wasu daga cikin masu zanga-zangar na ɗauke da alluna masu rubuce-rubuce, yayin da wasu ke daga jajayen tutoci masu ɗauke da alamomin gurguzu da hotunan wasu mutane.
Haka kuma ana jin masu zanga-zangar suna rera taken adawa yayin da ‘yansanda suka ƙara tsaurara shingen tsaro a hanyoyin da ke kaiwa wajen taron na KICC.
Zanga-zangar ta zo ne a daidai lokacin da shugabanni fiye da 30 daga Afirka da Turai suka hallara a Nairobi domin taron Africa Forward Summit, wanda Kenya da Faransa suka shirya tare, inda ake tattauna harkokin kasuwanci, zuba jari, gine-ginen more rayuwa da haɗin gwiwar yaƙi da sauyin yanayi.
Shugaban Faransa Emmanuel Macron da Sakatare Janar na Majalisar DInkin Duniya Antonio Guterres na daga cikin manyan baƙin da suka halarci taron tare da shugabannin ƙasashen Afirka, ‘yankasuwa, jami’an diflomasiyya da abokan hulɗar ci gaba.
An ci gaba da ganin jami’an tsaro a ko ina cikin tsakiyar Nairobi tsawon ranar, inda ‘yansanda suka taƙaita zirga-zirga a kusa da manyan gine-ginen gwamnati, otal-otal da hanyoyin da ke haɗe da wajen taron.
