Madaxweynaha Soomaaliya, Xasan Sheekh Maxamuud, ayaa Arbacadii booqasho shaqo ku tagay dalka Jabuuti, hal maalin kaddib markii uu magaalada Addis Ababa kula soo kulmay Ra’iisul Wasaaraha Itoobiya, Abiy Ahmed.
Madaxweyne Xasan Sheekh ayaa Qasriga Jamhuuriyadda ee dalkaas wada-hadallo kula yeeshay dhiggiisa Jabuuti, Ismaaciil Cumar Geelle, iyadoo labada dhinac ay ka wada-arrinsadeen xiriirka laba-geesoodka ah iyo xaaladda guud ee Geeska Afrika.
Qoraal ka soo baxay Madaxtooyada Soomaaliya ayaa lagu sheegay in labada hoggaamiye ay si gaar ah u dul istaageen iskaashiga soo-jireenka ah ee dhinacyada amniga, dhaqaalaha, siyaasadda, iyo sidii loo xaqiijin lahaa nabadda iyo xasilloonida gobolka.
Dhankeeda, Madaxtooyada Jabuuti ayaa xaqiijisay in Madaxweyne Geelle uu qasrigiisa si diirran ugu qaabilay dhiggiisa Soomaaliya.
Booqashadan ayaa qayb ka ah safarro xiriir ah oo Madaxweyne Xasan Sheekh uu ku marayo dalalka Geeska Afrika, xilli xukuumadda Muqdisho ay xoogga saarayso adkeynta iskaashiga waddamada deriska ah, gaar ahaan arrimaha la xiriira amniga iyo is-dhexgalka dhaqaalaha.
Jabuuti ayaa ka mid ah waddamada sida dhow ula shaqeeya Soomaaliya, iyadoo muddo dheer, door muhiim ah ku lahayd dadaallada nabadda, diblumaasiyadda, iyo xasilloonida gobolka.
