Wasiirka Arrimaha Gudaha, Federaalka iyo Dib-u-heshiisiinta, Cali Yuusuf Cali Xoosh, ayaa booqasho shaqo ku tagay Agaasinka Diiwaangelinta Madaniga ah iyo Tirakoobka Dhacdooyinka Muhiimka ah, isagoo diiradda saaray nidaamyada suurageliya in muwaadiniinta si rasmi ah loo aqoonsado, dawladduna si wax-ku-ool ah ugu adeegto.
Wasiirka ayaa Agaasimaha Guud Cabdiqani Wehliye ka dhageystay warbixin ku saabsan shaqada socota, adeegyada dadweynaha iyo qorshayaasha lagu sii horumarinayo nidaamka diiwaangelinta madaniga ah. Wuxuu sidoo kale la kulmay shaqaalaha qaybaha kala duwan ee Agaasinka, isagoo kormeeray shaqadooda kuna dhiirrigeliyay inay sii wadaan dadaallada lagu horumarinayo tayada iyo gaarsiinta adeegyada loo fidiyo shacabka Soomaaliyeed.
Wasiirka ayaa tilmaamay muhiimadda diiwaangelinta madaniga ah oo saldhig u ah aqoonsiga sharciyeed, bixinta adeegyada dadweynaha iyo qorsheynta dawladeed ee wax-ku-oolka ah.
Wasaaradda waxaa ka go’an inay ballaariso adeegyada diiwaangelinta madaniga ah, isla markaana horumariso nidaam mideysan oo u adeegi kara bulshooyinka ku nool guud ahaan Soomaaliya, si diiwaangelinta madaniga ahi u noqoto adeeg dadweyne oo si isa soo taraysa looga heli karo dalka oo dhan, laguna kalsoonaan karo.
