Madaxweynaha Iiraan, Masoud Pezeshkian, ayaa gaaray New York si uu uga qayb-galo kalfadhiga 81-aad ee Golaha Guud ee Qaramada Midoobay, xilli Mareykanka iyo Iiraan ay dagaal ku jiraan.
Diblumaasiyiin Iiraaniyiin ah, oo ay ku jiraan safiirka Iiraan iyo ku-xigeenka wakiilka joogtada ah ee Qaramada Midoobay, ayaa Pezeshkian iyo wafdigiisa ku soo dhaweeyay New York, kadib markii ay Talaadadii ka soo ambabaxeen Tehran.
Pezeshkian ayaa lagu wadaa inuu Arbacada khudbad ka jeediyo Golaha Guud, isagoo sidoo kale kulamo gaar ah la yeelan doona qaar ka mid ah madaxda ka qayb-galaysa shirarka Qaramada Midoobay iyo shakhsiyaad siyaasadeed iyo dhaqan.
Booqashada ayaa timid kadib markii xukuumadda Madaxweyne Donald Trump ay oggolaatay in wafdi kooban oo Iiraan ah uu ka qayb-galo toddobaadka shirarka heerka sare ee Qaramada Midoobay, iyadoo Washington ay sheegtay inay tallaabadaas u qaadayso waajibaadka ka saaran martigelinta xarunta Qaramada Midoobay.
Wafdiga loo oggolaaday inuu tago New York waxaa ka mid ah Pezeshkian, Wasiirka Arrimaha Dibadda Abbas Araghchi iyo diblumaasiyiinta muhiimka u ah wafdiga.
Mareykanka ayaa, si kastaba ha ahaatee, fiisaha u diiday xubno kale oo wafdiga ka mid ahaa, oo ay ku jiraan qaar ka mid ah shaqaalaha warbaahinta ee la socday madaxweynaha.
Safarka Pezeshkian ayaa indhaha lagu hayaa iyadoo Washington iyo Tehran ay weli dagaal ku jiraan, isla markaana ay socdaan dadaallo diblumaasiyadeed oo lagu doonayo in lagu yareeyo xiisadda labada dhinac.
