Wasiirka Caddaaladda iyo Arrimaha Dastuurka ee Soomaaliya, Xasan Macallin Maxamuud, ayaa magaalada Doha kula kulmay dhiggiisa dalka Qatar, Wasiirka Caddaaladda ahna Wasiiru-dowlaha Arrimaha Golaha Wasiirrada, Ibraahim bin Cali Al-Muhannadi.
Kulankan ayaa diiradda lagu saaray xoojinta iskaashiga laba-geesoodka ah ee dhinacyada sharciga iyo caddaaladda. Wasiirrada ayaa isla meel-dhigay muhiimadda ay leedahay in dib loo dardargeliyo heshiis is-afgarad (MoU) oo labada dal ay hore u kala saxiixdeen, kaas oo salka ku haya iskaashiga dhinaca sharciga.
Wada-hadallada ayaa si gaar ah loogu lafa-guray qorshayaasha horumarinta hay’adaha caddaaladda, casriyeynta adeegyada garsoorka, tayeynta shaqaalaha, iyo is-weydaarsiga khibradaha.
Sidoo kale, dhinacyada ayaa ka wada-hadlay ballaarinta wada-shaqeynta u dhexaysa Xarunta Daraasaadka Sharciga iyo Garsoorka ee dowladda Qatar iyo Machadka Tababarka Garsoorka ee Soomaaliya.
Intii uu kulanku socday, Wasiir Xasan Macallin ayaa xukuumadda Doha uga mahadceliyay taageerada joogtada ah ee ay la garab taagan tahay Soomaaliya. Wasiirka ayaa sidoo kale hoosta ka xarriiqay garab-istaagga buuxa ee dowladda Soomaaliya ay u muujinayso Qatar, xilligan ay gobolka Bariga Dhexe ka jiraan duruufo siyaasadeed oo xasaasi ah.
Gabagabadii, labada mas’uul ayaa isku raacay in la amba-qaado kulamo wada-tashi oo dhinaca farsamada ah, si loo hirgeliyo barnaamijyo iskaashi oo wax-ku-ool ah, loona sii adkeeyo xiriirka taariikhiga ah ee ka dhexeeya labada dal.
