Dhaxal-sugaha Sacuudiga Maxamed bin Salmaan ayaa Talaadadii magaalada Qaahira kula kulmay Madaxweynaha Masar Cabdifataax Al-Sisi, intii lagu guda jiray booqashadiisa Masar, xilli ay sii kordhayaan xiisadaha ka jira guud ahaan gobolka Bariga Dhexe.
Bin Salmaan ayaa gelinkii hore ee Talaadada gaaray caasimadda Masar, waxaana Garoonka Caalamiga ah ee Qaahira ku soo dhaweeyay Madaxweyne Sisi, sida ay sheegtay Wakaaladda Wararka Sacuudiga (SPA).
Sida laga soo xigtay Madaxtooyada Masar, wadahadallada ayaa la filayaa inay diiradda saaraan siyaabaha lagu xoojin karo xiriirka Masar iyo Sacuudi Carabiya ee dhinacyada kala duwan, iyadoo sidoo kale la isku dhaafsanayo aragtiyo ku saabsan horumarrada gobolka iyo kuwa caalamiga ah.
Booqashadan ayaa ku soo beegmaysa xilli xaaladaha gobolka ay si degdeg ah isu beddelayaan, oo ay ka mid yihiin xiisadaha ka jira Badda Cas iyo Baabul Mandab, iyo sidoo kale xaaladaha Yemen, Suudaan iyo Falastiin.
Iskaashiga dhaqaale ayaa sidoo kale weli ah qayb muhiim ah oo ka mid ah xiriirka Qaahira iyo Riyaad, iyadoo uu sii kordhayo ganacsiga, maalgashiga iyo mashaariicda wadajirka ah ee labada dal.
Bin Salmaan ayaa markii ugu dambeysay booqday Qaahira 15-kii Oktoobar 2024, markaas oo uu Sisi kala hadlay xiriirka labada dal iyo arrimaha gobolka iyo kuwa caalamiga ah.
