Xuutiyiinta Yemen ayaa gaaray Jasiiradda Perim ee ku taalla marin-biyoodka Bab al-Mandab, halka ay sidoo kale la wareegeen magaalada xeebeedka Dhubab, sida ay afar ilo oo ka tirsan dowladda Yemen u sheegeen Reuters.
Laba ilo oo ka tirsan dowladda Yemen ayaa sheegay in ciidamada dowladda ee taageerada ka hela Sacuudiga ay ka baxeen Jasiiradda Perim, halka Xuutiyiintu ay qabsadeen magaalada Dhubab oo ku taalla xeebta Yemen, dhanka ka soo horjeeda jasiiradda.
Horumarkan ayaa Xuutiyiinta u sii dhoweynaya gacan-ku-haynta Bab al-Mandab, oo ah marin-biyood istiraatiiji ah oo isku xira Badda Cas iyo Gacanka Cadmeed, isla markaana ah waddo muhiim u ah isu-socodka ganacsiga iyo tamarta caalamka. Jasiiradda Perim waxay ku taalla gudaha marin-biyoodka, halka Jabuuti iyo Eritrea ay kaga yaallaan dhinaca Afrika.
Haddii Xuutiyiintu si buuxda ula wareegaan Bab al-Mandab, tallaabadaasi waxay siin kartaa Iran, oo taageerta Xuutiyiinta, awood dheeraad ah oo ay ku saameyn karto marin muhiim u ah ganacsiga caalamka, iyadoo xiisadaha gobolka ay horey u carqaladeeyeen isu-socodka maraakiibta.
Dhinaca kale, ciidamada dowladda Yemen ayaa sheegay inay qorsheynayaan howlgallo ay dib ugu qabsanayaan goobaha ay Xuutiyiintu la wareegeen, waxaana la filayaa in hub iyo diyaarado loo diro deegaannada istiraatiijiga ah ee xeebta Badda Cas, oo ay ku jirto waddada u dhow magaalada Mocha.
Xuutiyiintu waxay Khamiistii la wareegeen magaalada Mocha, halka ay sidoo kale weerarro ka fuliyeen jasiiradaha Hanish ee Badda Cas, taasoo sii ballaarisay hawlgalladooda xeebaha Yemen. Reuters ayaa hore u sheegtay in horumarka degdegga ah ee Xuutiyiinta xeebaha Badda Cas uu la xiriiray taageero, hub iyo talooyin militari oo ay ka heleen Iran.
