Taliyaha Ciidanka Xoogga Dalka Soomaaliyeed, Sarreeye Guuto Ibraahim Maxamed Maxamuud, ayaa booqday Isbitaalka Recep Tayyip Erdoğan, oo hore loo oran jiray Isbitaalka Digfeer, halkaas oo lagu daweynayo qaar ka mid ah askarta Ciidanka Xoogga Dalka ee ku dhaawacmay hawlgallada amniga.
Taliyaha ayaa u kuurgalay xaaladda caafimaad ee askarta iyo daryeelka loo fidinayo, isagoo sidoo kale dhageystay baahiyahooda caafimaad iyo cabashooyinkooda.
Sarreeye Guuto Ibraahim Maxamed Maxamuud ayaa askarta dhaawacantay u muujiyay garab istaag iyo walaaltinimo, isagoo Alle uga baryay inuu siiyo caafimaad degdeg ah.
Intii uu booqashada ku jiray, Taliyaha ayaa sidoo kale booqday carruur lagu daweynayo isbitaalka, isagoo dhakhaatiirta iyo maamulka isbitaalka ka wareystay xaaladdooda caafimaad. Waxa uu sidoo kale taageero iyo dhiirrigelin u muujiyay carruurta iyo qoysaskooda.
Taliyaha ayaa sidoo kale maamulka isbitaalka oo uu hoggaaminayay Agaasimaha Guud ka dhageystay warbixin ku saabsan adeegyada caafimaad iyo daryeelka loo fidiyo bukaannada iyo askarta dhaawacantay.
Booqashadan ayaa qayb ka ah dadaallada Taliska Ciidanka Xoogga Dalka Soomaaliyeed ee lagu xoojinayo daryeelka iyo taageerada xubnaha ciidamada qalabka sida iyo bulshada Soomaaliyeed.
