Wasiirka Warfaafinta, Dhaqanka iyo Dalxiiska ee Dowladda Federaalka Soomaaliya, Cabdifataax Qaasim Maxamuud, ayaa khudbad ka jeediyay Madasha 7-aad ee Caalamiga ah ee Wadahadalka Dhaqammada ee Isbahaysiga Ilbaxnimooyinka Qaramada Midoobay, taas oo uu Talaadadii si rasmi ah u furay Madaxweynaha Azerbaijan, Ilham Aliyev.

Madashan oo halku-dhiggeedu yahay “Wadahadalka Mustaqbalka Wadajirka ah: Dhisidda Buundooyin Isku Xira Dunida Kala Qaybsan” ayaa diiradda lagu saarayaa xoojinta wadahadalka dhaqammada kala duwan, nabadda, isfahamka iyo iskaashiga caalamiga ah.

Wasiir Cabdifataax ayaa khudbaddiisa ku tilmaamay muhiimadda ay leedahay ilaalinta iyo horumarinta dhaxalka dhaqanka, xoojinta wada noolaanshaha nabadeed iyo adeegsiga tiknoolajiyadda casriga ah iyo sirdoonka macmalka ah si loo kobciyo isfahamka dhaqammada kala duwan.

Wasiirka ayaa carrabka ku adkeeyay baahida loo qabo ilaalinta afka, suugaanta, fanka iyo taariikhda Soomaaliya, iyadoo tiknoolajiyadda loo adeegsanayo diiwaangelinta, ilaalinta iyo gudbinta dhaxalka dhaqanka Soomaaliyeed si ay u gaaraan jiilasha soo socda.

Wuxuu sidoo kale ku baaqay iskaashi caalami ah oo lagu horumarinayo adeegsiga luqadaha kala duwan ee tiknoolajiyadda, kor loogu qaadayo xirfadaha dhallinyarada, laguna xaqiijinayo in horumarka dijitaalka ahi ixtiraamo aqoonsiyada dhaqameed, xuquuqda iyo qiyamka bulshooyinka.

Wasiirka ayaa intaas ku daray baaq ku aaddan in tiknoolajiyadda loo adeegsado isku xirka dhaqammada, ballaarinta fursadaha isfahamka iyo xoojinta nabadda. Wuxuu sidoo kale ku baaqay in talooyinka iyo ballanqaadyada madasha loo beddelo barnaamijyo wadajir ah oo natiijooyinkooda la cabbiri karo, kuwaas oo taageeraya ilaalinta dhaxalka dhaqanka, horumarinta luqadaha, awood-siinta dhallinyarada iyo ka qaybgalka loo siman yahay.

Madasha waxaa sidoo kale ka qaybgalay Safiirka Soomaaliya u fadhiya Azerbaijan, Cabdinuur Daahir Fiidow.