Madaxda qaranka, oo ay ku jiraan laba Ra’iisul Wasaare oo hore iyo laba Madaxweyne oo hore u soo hoggaamiyay Galmudug, ayaa Liibaan Axmed Xasan ugu hambalyeeyay doorashadiisa Madaxweynaha Galmudug, kaddib markii Golaha Wakiillada dowlad-goboleedka uu Khamiistii ku doortay magaalada Dhuusamareeb.
Madaxweynaha xilka ka degaya, Axmed Cabdi Kaariye, ayaa Liibaan ugu hambalyeeyay ku guuleysiga hoggaanka Galmudug shanta sano ee soo socota, isagoo sidoo kale Cabdiweli Ibraahim Aadan ugu hambalyeeyay doorashadiisa Madaxweyne Ku-xigeenka. Wuxuu Alle uga baryay inuu u fududeeyo mas’uuliyadda culus ee loo igmaday, kuna garab galo u adeegidda shacabka iyo deegaannada Galmudug.
Ra’iisul Wasaarihii hore ee Soomaaliya, Cumar Cabdirashiid Cali Sharmaarke, ayaa hambalyo u diray Madaxweynaha cusub, isagoo rajeeyay in muddada xilkiisu ay shacabka Galmudug iyo dowlad-goboleedyada deriska la ah u horseeddo xasillooni, barwaaqo iyo mustaqbal wanaagsan.
Madaxweynihii hore ee Galmudug, Cabdikariim Xuseen Guuleed, ayaa sheegay inuu Liibaan muddo dheer yaqaanay, isla markaana ay soo wada shaqeeyeen. Wuxuu ku tilmaamay hoggaamiye xikmad badan, deggan oo karti sare leh, fahamsanna shacabka iyo deegaanka loo doortay inuu hoggaamiyo. Guuleed ayaa sheegay inuu aaminsan yahay in Liibaan yahay hoggaamiyaha ay Galmudug u baahan tahay xilligan, si uu ugu hoggaamiyo horumar iyo xasillooni.
Guuleed ayaa ugu baaqay waxgaradka iyo hoggaamiyeyaasha Galmudug, kuwa mucaaradka iyo kuwa dowladda labadaba, inay Madaxweynaha cusub ku qaabilaan niyad wanaagsan, lana shaqeeyaan.
Ra’iisul Wasaarihii hore ee Soomaaliya, Maxamed Xuseen Rooble, ayaa isaguna Liibaan ugu hambalyeeyay doorashadiisa Madaxweynaha Galmudug, isagoo Alle uga baryay inuu u fududeeyo mas’uuliyadda culus ee uu qaaday.
Xildhibaan Cabdiladiif Muuse Nuur Sanyare ayaa Madaxweynaha cusub ugu hambalyeeyay guushiisa, wuxuuna u rajeeyay inuu ku guuleysto gudashada waajibaadkiisa.
Siyaasiga Cabdiraxmaan Odowaa ayaa sheegay inuu Liibaan si wanaagsan u yaqaan, isagoo ku tilmaamay shaqsi karti iyo aragti fog leh, awoodna u leh inuu bulshada mideeyo. Wuxuu sheegay inuu aaminsan yahay in Liibaan uu door weyn ka qaadan karo xoojinta midnimada, wadajirka iyo isfahamka Galmudug.
Madaxweynaha xilka ka degaya, Axmed Cabdi Kaariye, ayaa ugu baaqay dhammaan shacabka Galmudug inay taageeraan hoggaanka cusub, isla markaana ay ka wada shaqeeyaan xoojinta midnimada, dib-u-heshiisiinta, nabadda iyo horumarka dowlad-goboleedka.
