Guddoomiyaha Hay’adda Maareynta Musiibooyinka Qaranka (SoDMA), Maxamuud Macallin Cabdulle, ayaa kulan la yeeshay Agaasimaha Xafiiska Gurmadka Degdegga ah iyo Adkeysiga ee Hay’adda Cuntada iyo Beeraha ee Qaramada Midoobay (FAO), Rein Paulsen, Wakiilka FAO ee Soomaaliya, Etienne Peterschmitt, iyo wakiillo ka socday Dowladda Norway. Kulanka ayaa diiradda lagu saaray xoojinta iskaashiga u diyaargarowga El Niño, digniinta hore iyo tallaabooyinka degdegga ah ee looga hortagayo saameynta musiibooyinka.
Intii uu kulanku socday, labada dhinac ayaa ka wada hadlay sidii digniinaha hore loogu xiri lahaa tallaabooyin ka hortag ah oo hore loo qaado, isla markaana la isku dubbariday, si loo badbaadiyo nolosha dadka, loo ilaaliyo ilaha nololeed ee bulshada, loona yareeyo saameynta fatahaadaha iyo khataraha kale ee la xiriira El Niño.
Kulanka ayaa sidoo kale lagu adkeeyay muhiimadda ay leedahay mobilinta maalgelin iyo taageero dheeraad ah oo wax looga qabanayo baahiyaha bani’aadannimo ee taagan, iyadoo la xoojinayo maalgashiga muddada dheer ee u diyaargarowga musiibooyinka, yareynta khataraha iyo dhisidda adkeysiga bulshada.
Ugu dambeyn, Guddoomiyaha SoDMA, Maxamuud Macallin Cabdulle, ayaa xaqiijiyay sida ay hay’addu uga go’an tahay hoggaaminta dowladda ee maareynta khataraha musiibooyinka, xoojinta isku-duwidda iyo horumarinta iskaashiga hay’adaha caalamiga ah iyo bah-wadaagta kale, si loo xaqiijiyo gurmad waqtigiisa ku yimaada iyo awood dowladeed oo wax-ku-ool ah.
