Hay’adda Istaatistikada Qaranka Soomaaliyeed (SNBS) ayaa ka qaybgashay Kalfadhigii 10-aad ee Guddiga Tirakoobka Afrika, oo lagu qabtay magaalada Addis Ababa ee dalka Itoobiya intii u dhexeysay 21-dii ilaa 23-dii Oktoobar 2026. Hay’addu waxay ka qayb qaadatay wadahadallada ku saabsan xoojinta nidaamyada tirakoobka iyo horumarinta adeegsiga mas’uuliyadda leh ee tiknoolajiyadaha cusub ee qaaradda Afrika.
Kalfadhigan, oo halku-dhiggiisu ahaa “Ka Faa’iideysiga Qiimaha Xogta Afrika: In Tirakoobyada Rasmiga ahi Noqdaan Muraayad Si Dhab ah u Muujisa Xaaladda Qaaradda,” ayaa isu keenay hay’adaha tirakoobka ee dalalka Afrika, si looga wada hadlo helitaanka xog lagu kalsoonaan karo oo la mideeyay, iyo doorka tirakoobyada rasmiga ahi ku leeyihiin isbeddelka dhaqaalaha iyo horumarka waara.
Agaasimaha Guud ee Hay’adda Istaatistikada Qaranka Soomaaliyeed, Dr. Cabdisalaan Maxamed, ayaa ka qaybgalay dood heer sare ah oo ku saabsan diyaar-garowga adeegsiga Garaad Gacmeedka (AI) ee tirakoobyada rasmiga ah. Doodda ayaa lagu falanqeeyay sidii hay’adaha tirakoobka qaranku si wax ku ool ah ugu adeegsan lahaayeen AI, iyagoo isla markaana xoojinaya awoodda hay’adahooda, kaabeyaasha dijitaalka ah, maamulka xogta iyo khibradaha farsamo.
Hay’adda SNBS ayaa tilmaantay fursadaha uu Garaad Gacmeedku u leeyahay hagaajinta soo saarista tirakoobyada, habaynta iyo falanqaynta xogta, aqoonsiga isbeddellada cusub iyo fududeynta helitaanka tirakoobyada rasmiga ah ee ay adeegsadaan go’aan-qaadayaasha. Waxay sidoo kale carrabka ku adkeysay in AI uu kaabayo qiimeynta xirfadeed ee khubarada tirakoobka, iyadoo la ilaalinayo saxnaanta, madax-bannaanida, sirta xogta iyo kalsoonida bulshada.
Kalfadhiga ayaa sidoo kale looga hadlay sinnaan la’aanta, kala duwanaanshaha horumarineed ee gobollada, dhaqdhaqaaqyada dhaqaalaha aan rasmiga ahayn, nuglaanshaha iyo cadaadiska deegaanka. Ka qaybgalayaasha ayaa ka wada hadlay sidii loo xaqiijin lahaa in nidaamyada tirakoobka Afrika ay si wanaagsan uga tarjumaan xaaladaha dhabta ah ee horumarka qaaradda.
Ka qaybgalka Soomaaliya ee kalfadhigan ayaa qayb ka ah dadaallada socda ee lagu xoojinayo nidaamka tirakoobka qaranka, lagu hagaajinayo tayada iyo waxtarka xogta rasmiga ah, laguna taageerayo qorsheynta, maalgashiga iyo siyaasadaha dadweynaha ee ku saleysan xog iyo caddeymo sugan.
