Ra’iisul Wasaaraha Qatar ahna Wasiirka Arrimaha Dibadda, Sheekh Maxamed bin Cabdiraxmaan Al Thani, ayaa Ra’iisul Wasaaraha Israa’iil, Benjamin Netanyahu, ku tilmaamay “dambiile dagaal”, isagoo dhanka kale xaqiijiyay in xukuumadda Doha ay sii wadi doonto dadaallada dhex-dhexaadinta ah, inkastoo xiisadaha gobolku ay sare u kaceen.
Wareysi uu Talaadadii siiyey wariyaha u dhashay dalka Britain ee Piers Morgan, ayaa Sheekh Maxamed lagu weydiiyey bal inuu Netanyahu u arko dambiile dagaal.
“Dabcan. Waxa Qaza laga geystay waa dambiyo dagaal, qof kasta oo mas’uul ka ahna waa dambiile dagaal,” ayuu yiri.
Waxa uu tilmaamay in la bartilmaameedsaday isbitaallo iyo iskuullo, isagoo intaas ku daray in dood kasta oo lagu difaacayo falalkaas aysan marmarsiiyo u noqon karin weerarrada noocaas ah.
Sheekh Maxamed ayaa sidoo kale Netanyahu ku eedeeyey inuu Qatar ku hayo weerarro siyaasadeed, si uu indhaha caalamka uga leexiyo falalka lagu eedeynayo isaga iyo xukuumaddiisa.
Weerarkii Doha
Ra’iisul Wasaaraha Qatar ayaa mar kale cambaareeyey weerarkii ay Israa’iil 9-kii Sebtembar 2025 ka geysatay magaalada Doha, kaas oo lagu bartilmaameedsaday saraakiil ka tirsan ururka Xamaas, xilli ay Qatar wadday dadaallo dhex-dhexaadin ah. Weerarkaas ayaa lagu dilay shan xubnood oo ka tirsanaa Xamaas iyo sarkaal amni oo u dhashay dalka Qatar.
“Waxaa na soo weerartay Israa’iil annagoo dhex-dhexaadin wadna,” ayuu yiri Sheekh Maxamed, oo dhacdadaas ku tilmaamay weerar aan horay loo arag oo lagu qaado dal dhex-dhexaadinaya dhinacyo is-haya. Waxa uu intaas raaciyay in Netanyahu uu “xaddiga ka gudbay”, sida uu hadalka u dhigay.
Dhex-dhexaadinta Mareykanka iyo Iiraan
Inkasta oo khilaafaadka gobolku ay sii xoogeysanayaan, Sheekh Maxamed waxa uu hoosta ka xarriiqay in Qatar aysan ka laaban doonin dadaalladeeda diblumaasiyadeed, isagoo xusay in Doha ay isku dayeyso inay talooyin iyo waddooyin xal ah u soo bandhigto Mareykanka iyo Iiraan.
Qatar ayaa maalmahan sii wadday gudbinta farriimaha u dhexeeya Washington iyo Tehran, iyadoo wada-hadallada diiradda lagu saarayo sidii loo yareyn lahaa xiisadda, dibna loogu soo celin lahaa hannaanka wada-xaajoodka.
Ra’iisul Wasaaraha ayaa carrabka ku adkeeyay in saddex qodob ay muhiim u yihiin dejinta xiisadda gobolka; kuwaas oo kala ah: barnaamijka nukliyeerka Iiraan iyo cunaqabateynta saaran, xorriyadda isu-socodka maraakiibta ee Marinka Hormuz, iyo dhisidda qaab-dhismeed amni oo goboleed oo ay qayb ka yihiin Iiraan iyo dalalka ku bahoobay Golaha Iskaashiga Khaliijka (GCC).
Waxa uu xusay in nidaam kasta oo amni oo gobolka laga yagleelayo ay tahay inuu ku saleysnaado wada-hadal, faragelin la’aan, iyo inaan la isku gardarroon, iyadoo dhanka kalena la xoojinayo iskaashiga dhaqaale.
‘Xalka nabadeed ayaa mudnaanta leh’
Dhinaca kale, Afhayeenka Wasaaradda Arrimaha Dibadda Qatar, Majed Al Ansari, ayaa sheegay in Doha ay sii waddo xiriirrada iyo dhex-dhexaadinta u dhexeysa Mareykanka iyo Iiraan.
Waxa uu tilmaamay in dalkiisu uu gudbinayo farriimo labada dhinac ah, isla markaana ay ka walaacsan yihiin in xiisadda milateri ay sii fido.
Dadaallada Qatar ayaa socda xilli Washington iyo Tehran aysan weli heshiis ka gaarin qodobbada ugu waaweyn ee khilaafka, inkastoo labada dhinac ay sii wadaan xiriirro dadban oo ay Doha garwadeen ka tahay.
Xukuumadda Doha ayaa ku adkeysaneysa in wada-hadalka iyo diblumaasiyaddu ay yihiin waddada keliya ee ugu habboon ee looga hortagi karo dagaal kale oo ballaaran oo ka qarxa gobolka.
