Hukumar Lafiya ta Duniya (WHO) ta sanar a ranar Juma’a cewa ta amince da share-fage ga wani maganin zazzabin cizon sauro domin sabuwar haihuwa da jarirai a karon farko.

Artemether-lumefantrine shi ne nau’in maganin zazzabin cizon sauro na farko da aka haɗa don ƙananan yara waɗanda cutar ke hallakawa.

“Wannan amincewar na nuna cewa maganin ya cika ƙa’idojin duniya na inganci, aminci, da kuma kariya,” in ji WHO a cikin wata sanarwa.

Har zuwa yanzu, ana yi wa jarirai magani ne da nau’o’in magunguna da aka yi domin manyan yara — wanda hakan ke ɗauke da babban haɗarin kuskure wajen auna kashi, illolin magani, da kuma guba a jiki.

“Shekaru aru-aru, zazzabin cizon sauro yana raba iyaye da ‘ya’yansu, yana kuma tauye lafiya, arziki, da fatan al’ummomi,” in ji shugaban WHO, Tedros Adhanom Ghebreyesus.

‘Labarin na sauyawa’

“Amma a yau, labarin yana sauyawa. Sabbin rigakafi, gwaje-gwajen tantance cuta, gidajen sauro na zamani, da ingantattun magunguna, har da waɗanda aka samar domin ƙananan yara, suna taimakawa wajen juya akalar lamarin.

“Kawo ƙarshen zazzabin cizon sauro a zamaninmu ba mafarki ba ne kawai — abu ne mai yiwuwa, amma sai fa idan an samu ɗorewar jajircewa ta siyasa da ta kuɗi. Yanzu za mu iya. Kuma yanzu dole ne mu yi.”

A shekarar 2024, an kiyasta cewa mutane miliyan 282 ne suka kamu da zazzabin cizon sauro, yayin da mutane 610,000 suka mutu a ƙasashe 80, a cewar WHO.

Yankin Afirka ne ke da kashi 95 cikin ɗari na mace-mace da masu kamuwa da cutar, inda yara ’yan ƙasa da shekaru biyar ke da kashi uku cikin huɗu na waɗannan mace-mace.

Gibi a wajen jiya

Hukumar lafiya ta MDD ta ce ana samun cikas wajen yaƙi da zazzabin cizon sauro sakamakon jurewar da ƙwayoyin cutar ke yi wa magunguna, da jurewar da sauro ke yi wa maganin feshi, da gazawar gwajin tantance cuta, da kuma raguwar tallafin kuɗi daga ƙasashen waje.

WHO ta bayyana cewa wannan amincewar za ta ba wa ɓangaren gwamnati damar sayo maganin, kuma hakan zai taimaka wajen cike gibin da aka daɗe ana samu na jinyar kusan jarirai miliyan 30 da ake haifa kowace shekara a yankunan Afirka da zazzabin cizon sauro ya yi katutu.

A duniya, kashi 70 cikin ɗari na ƙasashe ba su da tsarin dokoki masu ƙarfin da za su iya sa ido kan magunguna, da rigakafi, da gwaje-gwaje, da kuma kayayyakin kiwon lafiya.

Shirin amincewar share-fage na WHO yana tabbatar da cewa muhimman kayayyakin kiwon lafiya da za a saya don amfanin duniya sun cika ƙa’idodin inganci, da aminci, da kariya na duniya.