Shugaban Koriya ta Arewa Kim Jong-un ya bayar da umarnin ƙera jirage marasa matuƙa na yaƙi 'masu yawa', kamar yadda kafar watsa labarai ta ƙasar ta ruwaito a ranar Juma'a.
Wannan na zuwa ne a daidai lokacin da ake fargabar yadda dangantakar ƙasar ke ƙara ƙarfi tsakaninta da Rasha ta ɓangaren soji ke ƙaruwa.
Kim a ranar Alhamis ya kai ziyara a lokacin da ake gwajin jiragen waɗanda aka ƙera su domin kai hari a cikin ruwa da kan tudu, wanda kamfanin ƙera jirage marasa matuƙa na Koriya ta Arewa ke ƙerawa, kamar yadda kamfanin dillancin labaran ƙasar KCNA ya ruwaito.
An tsara jiragen ne domin su yi jigilar ababen fashewa tare da jefa su kan abokan gaba.
A gwajin da aka gudanar a ranar Alhamis, an ga yadda jiragen marasa matuƙa suka kai hari "daidai saitin" da suka harba bama-baman.
Kim ya ƙara da cewa jiragen marasa matuƙa na da "sauƙin amfani... wurin kai hari" sakamakon sauƙin farashin ƙera su da kuma nisan zangon da suke da su, kamar yadda KCNA ya ruwaito.
Ya bayyana cewa ƙasarsa a ‘yan kwanakin nan “ta bayar da muhimmanci” ga samar da jirage marasa matuƙa domin saka su a tsare-tsaren soji na ƙasar.
Ƙasar mai makamin nukiliya ta cim ma yarjeniyar tsaro da Moscow tare da zarginta da aika dubban sojojinta zuwa Rasha domin taimaka wa yaƙin da ake gudanarwa na Ukraine, wanda hakan ya sa shugaban Koriya ta Kudu ya ɓara inda ya yi gargaɗin cewa akwai yiwuwar aikawa da kayayyakin soji na fasaha masu haɗari zuwa Koriya ta Arewa.
Fasahar Rasha?
Masana sun bayyana jiragen marasa matuƙan -- da ke cikin hotunan da kafar watsa labarai ta ƙasar ta fitar a watan Agusta – kan cewa suna kama da jirgi maras matuƙi na Isra’ila ƙirar “HAROP”, da na Rasha ƙirar “Lancet-3” da na Isra’ila “HERO 30”.
Akwai yiwuwar Koriya ta Arewa ta mallaki waɗannan kayayyakin na fasaha daga Rasha, ita kuma ta samu daga Iran – inda Tehran ita kanta ake zarginta da satar fasahar daga Isra’ila.
A 2022, Pyongyang ta tura jirage marasa matuƙa inda suka tsallake iyaka waɗanda sojojin Seoul suka kasa kakkaɓowa, inda suka ce sun yi ƙanƙanta.
A wannan shekara, Koriya ta Arewa ta yi ta aika balan-balan masu ɗauke da bama-bamai a cikin Koriya ta Kudu, lamarin da ta kira mayar da martani ga ayyukan masu gwagwarmaya.
Haka kuma Koriya ta Arewa ta zargi Seoul da keta mata alfarmar ƙasa ta hanyar aika jirage marasa matuƙa cikin Pyongyang babban birnin ƙasarta domin ajiye takardun farfaganda.
Ta hanyar sanar da “samarwa da aika jirage marasa matuƙa”, akwai yiwuwar Koriya ta Arewa za ta biyo baya, kamar yadda Yang Moo-jin, shugaban Jami’ar Nazari kan Koriya ta Arewa a Seoul ya shaida wa kamfanin dillancin labarai na AFP.
Pyongyang na iya kasancewa "tana ba da shawarar yiwuwar yin amfani da balan-balan don yada takardun farfaganda zuwa Koriya ta Kudu da irin waɗannan jiragen,” in ji Yang.
Ya kara da cewa, "Idan aka yi la'akari da tasirin hare-haren jiragen sama da aka gani a yakin Ukraine, za a iya amfani da su yadda ya kamata a rikicin da ke faruwa a can."
