Rais wa Marekani, Donald Trump, ameonekana kukusarishwa na Iran baada ya nchi hiyo kukanusha kuwa iko katika mazungumzo na Marekani, akisema kupitia ujumbe mkali kwenye mitandao ya kijamii kwamba mzingiro wa kijeshi wa Marekani utaendelea hadi kutakapofikiwa "makubaliano, au kujisalimisha."

Akiitaja Iran kuwa "ya hila na isiyoaminika" kwa kusema "wazi na kwa fahari" kwamba haifanyi mazungumzo, Trump aliandika Jumatatu: "Iran ikubali au isikubali, ukweli ni kwamba tunazungumza kuhusu suluhisho la tatizo ambalo wao wenyewe wamelisababisha kwa miongo kadhaa."

Kauli ya Trump kwenye mtandao wa Truth Social ilikuja baada ya Iran kukanusha kuwepo kwa mazungumzo ya moja kwa moja na Marekani, tofauti na madai ya Trump kwamba mazungumzo hayo yatakuwepo, alipositisha kile alichokiita duru ya mashambulizi makubwa dhidi ya Iran mwishoni mwa wiki. Trump alisema alifanya hivyo kufuatia maombi kutoka kwa mataifa ya eneo hilo na kutoka Iran.

Wizara ya Mambo ya Nje ya Iran imesema Jumatatu kwamba mazungumzo pekee inayofanya ni na Oman, yakihusu mipango ya kushirikiana katika usimamizi wa Mlango-Bahari wa Hormuz, njia muhimu kwa biashara ya nishati duniani.

Trump amesisitiza kuwa Iran ndiyo iliyotaka mazungumzo — "wengine wanaweza kusema waliomba" — lakini sasa, kwa mujibu wake, inaendelea kutoa "maneno yao ya kawaida yasiyo na msingi" kuhusu udhibiti wa Mlango wa Hormuz.

Trump amedai kuwa Mlango wa Hormuz "tayari unadhibitiwa kikamilifu na Jeshi la Wanamaji la Marekani kupitia 'mzingiro' wetu, au kama wengine wanavyouita, 'Ukuta wa Chuma wa Marekani.' Hakuna chochote kinachofika Iran isipokuwa pale tunapotaka, na hakuna kitakachopita hadi pale makubaliano yatakapofikiwa au Iran itakapojisalimisha kabisa."

Trump alianzisha vita dhidi ya Iran kwa kushirikiana na Israel tarehe 28 Februari.

Malengo ya awali yalikuwa kuharibu sekta ya nyuklia ya Iran, uwezo wake wa makombora, pamoja na kuunga mkono uasi wa wananchi dhidi ya serikali.

Zaidi ya miezi mitano baadaye, Iran bado ina uwezo wa kurusha makombora na ndege zisizo na rubani dhidi ya malengo ya Marekani na washirika wake katika eneo hilo, na bado inahifadhi akiba yake ya urani iliyorutubishwa.

Licha ya shinikizo la Marekani, mashambulizi ya Iran dhidi ya meli katika Mlango wa Hormuz yameathiri kwa kiasi kikubwa biashara ya nishati duniani, na kuipa Iran nafasi mpya ya nguvu katika mvutano huo.