Wasiirka Gaashaandhigga Xukuumadda Federaalka Soomaaliya, Axmed Macallin Fiqi, ayaa xafiiskiisa ku qaabilay wafdi saraakiil milatari oo Turki ah oo uu hoggaaminayay Taliyaha Akadeemiyadda Tababarka Militariga TURKSOM, Sarreeye Gaas Sabahattin Kalkan.
Wafdiga waxaa ka mid ahaa Kabtan Dr. Haldun S. Çetinarslan, U-qeybsanaha Arrimaha Militariga iyo Ciidamada Badda ee Turkiga, oo soo gabagabeynaya muddadii xilkiisa Soomaaliya, iyo Gaashaanle Sare Dr. Mehmet Serhan Yıldız, U-qeybsanaha cusub ee Arrimaha Ciidamada Cirka ee Turkiga.
Kulanka ayaa diiradda lagu saaray xoojinta iskaashiga difaaca ee Soomaaliya iyo Turkiga, gaar ahaan dhinacyada tababarka iyo kor u qaadista awoodda Ciidamada Qalabka Sida ee Soomaaliya.
Wasiirka ayaa bogaadiyay doorka TURKSOM ee tababarka iyo horumarinta xirfadaha aqooneed ee ciidamada Soomaaliyeed. Wuxuu Dawladda Turkiga uga mahadceliyay taageerada joogtada ah ee ay siiso dadaallada Soomaaliya ee dib loogu dhisayo ciidamadeeda qalabka sida, laguna xaqiijinayo amniga iyo xasilloonida dalka.
