Guddoomiyaha Golaha Sare ee Qaranka Suudaan ahna Taliyaha Guud ee Ciidamada Qalabka Sida, Jeneraal Cabdel Fataax al-Burhan, ayaa booqasho ku tagay magaalada Asmara, halkaas oo uu kulan kula yeeshay Madaxweynaha Ereteriya Isaias Afwerki.
Labada hoggaamiye ayaa ka wada hadlay xoojinta xiriirka laba geesoodka ah ee Suudaan iyo Eritrea, ballaarinta iskaashiga iyo sidii loo sii adkeyn lahaa wada-tashiga ku saabsan arrimaha ay labada dal danaha wadaagga ah ka leeyihiin, sida ay sheegeen warbaahinta dowladda Suudaan iyo Eritrea.
Al-Burhan ayaa sheegay in booqashadiisu ay muujinayso xiriirka taariikhiga ah iyo kan bulsho ee ka dhexeeya labada dal ee deriska ah, isaga oo bogaadiyay mowqifka Eritrea ee ku aaddan xaaladda ka taagan Suudaan.
Sida ay sheegtay wakaaladda wararka Eritrea, kulanka ayaa sidoo kale diiradda lagu saaray arrimaha gobolka iyo sidii Asmara iyo Khartuum ay u xoojin lahaayeen isku-duwidda iyo wada-shaqeynta dhinacyada ay wadaagaan.
Al-Burhan ayaa galinkii hore ee maanta dib ugu laabtay Suudaan kaddib markii uu soo gabagabeeyay booqashadiisa Asmara iyo wadahadalladii uu la yeeshay Madaxweyne Afwerki.
