Wasiiru-dawlaha Gaashaandhigga, Cumar Cali Cabdi, ayaa maalintii Isniinta xubnaha Golaha Shacabka ee Baarlamaanka Federaalka Soomaaliya hor-geeyay warbixinta akhrinta koowaad ee Hindise-sharciyeedka Difaaca Qaranka, oo ay soo diyaarisay Wasaaradda Gaashaandhigga.
Kulanka 15-aad ee kalfadhiga siddeedaad ee Baarlamaanka ayaa waxaa shir guddoomiyay Guddoomiyaha Golaha Shacabka, Cabdulqaadir Maxamed Nuur (Jaamac).
Wasiiru-dawlaha ayaa ka jawaabay su’aalaha xildhibaannada iyo aragtiyihii ay ka dhiibteen mabaadi’da guud ee Hindise-sharciyeedka, si waafaqsan Qodobka 84-aad ee Xeer-hoosaadka Golaha.
Hindise-sharciyeedka Difaaca Qaranka ayaa muhiim u ah dhismaha iyo xoojinta qaab-dhismeedka sharci ee difaaca qaranka. Xubnaha Golaha Shacabka ayaa maalmaha soo socda ka doodi doona Hindise-sharciyeedka, iyadoo uu u gudbayo marxaladaha xiga ee loo marayo ansixintiisa.
