Madaxa sirdoonka Turkiga Ibrahim Kalin ayaa sheegay in nabad aan laga heli karin Bariga Dhexe haddii aan wax laga qaban qadiyadda Falastiin, lana soo afjarin gumeysiga Israa’iil.
Isagoo Jimcihii ka hadlayay munaasabadda furitaanka rasmiga ah ee Madasha TRT World 2026 oo lagu qabtay Xarunta Shirarka Istanbul, Kalin ayaa yiri:
“Qaza la’aanteed Falastiin ma jirto, Bariga Dhexena nabad kama dhalan karto haddii aan nabad laga gaarin qadiyadda Falastiin.”
“Falastiiniyiintu dhibaatada ma aha; dhibaatadu waa gumeysiga,” ayuu raaciyay, isagoo carrabka ku adkeeyay in “haddii aan gumeysiga la soo afjarin, aysan Bariga Dhexe ka jiri doonin xal, nabad iyo caddaalad midna.”
Kalin ayaa sheegay in Qaza ay tahay qayb aan ka go’i karin Falastiin, halganka Falastiiniyiintuna uu ka gudbay arrimaha dhulka oo uu ku saabsan yahay mabaadi’da ballaaran ee caddaaladda iyo sinnaanta.
“Qaza waa qayb ka mid ah Falastiin, Falastiinna waa qayb ka mid ah halganka loogu jiro caddaalad, sharaf iyo sinnaan loo helo dhammaan dadka,” ayuu yiri.
“Arrintu kuma koobna dhul oo keliya; waxay sidoo kale ku saabsan tahay qiyamka caalamiga ah iyo mabaadi’da anshaxa.”
Mar sii horreysay, Madaxweynaha Turkiga Recep Tayyip Erdogan oo isla madasha ka hadlay ayaa sheegay in dhacdooyinkii ugu dambeeyay ee gobolka ay muujinayaan in nidaamka caalamiga ah ee hadda jira uu “kor u qaaday calanka cad ee isdhiibidda,” isagoo hay’adaha caalamka ku eedeeyay inay dhinac ka taagan yihiin iyadoo rabshadaha Israa’iil ay ka sii socdaan Qaza iyo Daanta Galbeed ee la haysto.
